Մեկ տարուց քիչ ժամանակ է մնացել 2017 թվականի խորհրդարանական ընտրություններին։ Սահմանադրական փոփոխություններից հետո այս ընտրությունները որոշիչ են լինելու Հայաստանի համար, և հենց դա է պատճառը, որ քաղաքական դաշտն արդեն իսկ պատրաստվում է այդ ընտրություններին։
Եթե խորհրդարանում իշխող Հանրապետական կուսակցությունը միաձայն կողմ քվեարկեց Եվրասիական տնտեսական միությանը Հայաստանի անդամակցությանը, ապա ընդդիմությունն էլ՝ բացառությամբ մի քանի պատգամավորների, այդ հարցում չզիջեց իշխանություններին, և արդյունքում այսօրվա խորհրդարանը գրեթե ամբողջությամբ ծառայում է ռուսական շահերին։
«Լուսավոր Հայաստան» կուսակցության խորհրդի անդամ Հայկ Կոնջորյանը «Առաջին լրատվական»-ի հետ զրույցում նշեց, որ իրենք ի սկզբանե չեն բացառել դաշինքով հանդես գալու հնարավորությունը, բայց դրա շուրջ ավելի առարկայական քննարկում կսկսեն հոկտեմբերից։ Միևնույն ժամանակ Կոնջորյանը նշում է՝ դաշինք կազմելը ինքնանպատակ չպետք է լինի։
Հայոց համազգային շարժում կուսակցության վարչության անդամ Կարեն Կարապետյանն ընդգծեց, որ իրենց կուսակցությունը ևս պատրաստվում է 2017 թվականի ընտրություններին։ Հավանաբար կմասնակցեն դաշինքով կամ միավորման այլ ձևաչափով։
Կարապետյանը հավելում է՝ պետք է փաստել, որ քաղաքական դաշտն այսօր այնքան էլ կայացած չէ և մոտ չէ ժողովրդավարական կայուն քաղաքական համակարգ ունեցող պետություններին, որտեղ որոշիչը ոչ թե անձն է, այլ գաղափարախոսությունը։
Գերագույն խորհրդի պատգամավոր Ազատ Արշակյանը նշում է. «2017 թվականի ընտրություններին գնալու ենք ազգային-ազատագրական օրակարգով, և ժողովրդի կողմից ընտրված իշխանությունը կձևավորի մի քանի օրակարգային հարցեր՝ ազգային-ազատագրական, սոցիալական արդարության, և պարգև ստացած ունեցվածքն ապազգային ուժերից ազգայնացնելու հարցեր»։
Հասարակությունն այսօր առհասարակ թյուր ընկալում ունի եվրոպական արժեքների նկատմամբ, և մի ստվար զանգվածի մոտ առայժմ գերակշռում է այն կարծիքը, որ եթե ռուսը չլինի, թուրքը մեզ կուտի, իսկ Եվրոպան էլ ընդամենը միասեռականության քարոզիչ է։ Հայկ Կոնջորյանը նշում է՝ իշխանությունները տարիներ շարունակ վարել են եվրոպական արժեքները արժեզրկելու քաղաքականություն. երբ պետք են գրանտներ՝ իրենք եվրոպամետ են, իսկ երբ խոսքը ժողովրդավարական ընտրություններ անցկացնելու մասին է, ասում են՝ եվրոպական արժեքները դեմ են մեր ազգային ավանդույթներին։ Ուստի այս մեկ տարուց էլ քիչ ժամանակում անհրաժեշտ է քաղաքացիների հետ տանել ամենօրյա աշխատանք՝ ասում է մեր զրուցակիը։
