ԱՄՆ-ում հիվանդանոցները գոյատևում են վիրահատությունների հաշվին, որոնք հաճախ բոլորովին անհրաժեշտ չեն հիվանդին: Ավելին՝ շատ դեպքերում նման գործողությունները հանգեցնում են հիվանդի մահվան կամ հաշմանդամության՝ հաղորդում է USA Today-ը:
Պարբերականը որպես օրինակ ներկայացնում է երիտասարդ բեյսբոլիստի պատմությունը: Մարզումներից մեկի ժամանակ Ջոնաթան Սթելին կորցնում է գիտակցությունը, որից հետո նա փոխադրվում է Լուիզիանա նահանգի կլինիկաներից մեկը: Սրտաբան Մեհմուդ Պաթելը 22-ամյա Սթելիին խորհուրդ է տալիս կարդիոխթանիչներ տեղադրել, հակառակ դեպքում նա կապրի մինչև 30 տարեկան:
Բեյսբոլիստը հետևում է բժշկի խորհրդին՝ մոռանալով սպորտային կարիերայի մասին: Ամիսներ անց բժիշկը մեղադրվում է խարդախության և ոչ պետքական վիրահատություններ նշանակելու մեջ: Իմանալով այդ մասին՝ մարզիկը մի շարք հետազոտություններ է անցնում, որոնք ապացուցում են, որ նա վիրահատության կարիք չի ունեցել:
USA Today-ի փոխանցմամբ՝ սա միակ դեպքը չէ. ԱՄՆ-ում ամեն տարի տասնյակ հազարավոր ոչ պետքական վիրահատություններ են կատարվում: Դրանք կազմում են ընդհանուր բուժական ընթացակարգերի 20%-ը:
