Թուրքական T24 առցանց թերթի փոխանցմամբ՝ Թուրքիայի նախագահ Ռեջեփ Էրդողանը, ով ԱՄՆ-ում էր 74 տարեկանում մահացած աշխարհահռչակ բռնցքամարտիկ Մուհամեդ Ալիի հուղարկավորությանը մասնակցելու նպատակով, Թուրքիա կվերադառնա նախատեսված ժամկետից մեկ օր շուտ:
Հաղորդվում է, որ Էրդողանը, ով հունիսի 9-ին Լուիսվիլ քաղաքում մասնակցել է «ջանազ-նամազին» (մուսուլմանի աճյունի հուղարկավորությունից առաջ կատարված աղոթք), Թուրքիա կվերադառնա այսօր երեկոյան:
Պաշտոնապես չի հաղորդվել, թե որն է նրա կողմից այցը կիսատ թողնելու պատճառը: Ընդդիմադիր Sözcü թերթը նշել է, որ հուղարկավորության կազմակերպիչները մերժել են Էրդողանին, ով ցանկացել է, որ Մուհամեդ Ալի դագաղի վրա փռվի Քաաբայից բերված ծածկոցը:
Բացի այդ, Էրդողանը խնդրել էր, որ Թուրքիայի կրոնական հարցերով վարչության ղեկավար Մեհմեթ Գյորմեզը հուղարկավորության ժամանակ կարդա Ղուրանի սուրահներից մեկը, սակայն կրկին մերժում է ստացել: Թերթի պնդմամբ՝ դրանից հետո Էրդողանը որոշել է ժամկետից շուտ վերադառնալ Թուրքիա:
Ավելի վաղ հաղորդվել էր, որ Մուհամեդ Ալիի հուղարկավորության կազմակերպիչները չեղյալ են հայտարարել Էրդողանի ելույթը:
