ԱՄՆ նախկին պետքարտուղար Հիլարի Քլինթոնը սկսել է ԱՄՆ փոխնախագահի թեկնածուներ ընտրել։ Այս մասին Դեմոկրատական կուսակցությունից ԱՄՆ նախագահի փաստացի թեկնածուն հայտարարել է CNN-ի եթերում։
Ինչպես հստակեցրել է Քլինթոնը՝ փոխնախագահի պաշտոնի թեկնածուների իր ցուցակում կարող են ներառվել կանայք։ «Ես փնտրում եմ առավել որակավորված մարդկանց՝ ներառյալ, բնականաբար, կանանց։ Ես պետք է վստահ լինեմ, որ մարդը, ում ես կընտրեմ, կարող է անհրաժեշտության դեպքում անհապաղ անցնել պետության ղեկավարի պարտականությունների կատարմանը։ Սա գլխավոր պահանջն է որակավորման առումով»,- ասել է նա։
«Ինձ համար նշանակություն չունի, թե ով է այդ մարդը։ Գլխավորն այն է, որ նա կատարի հանձնարարված աշխատանքը»,- ասել է Քլինթոնը՝ հավելելով. «Ես չգիտեմ, թե որքան ժամանակ դրա համար կպահանջվի»։
Նրա գլխավոր մրցակիցը Հանրապետական կուսակցությունից՝ միլիարդատեր Դոնալդ Թրամփը, ավելի վաղ հայտնել էր, որ նեղացրել է փոխնախագահի պաշտոնին հավակնողների ցուցակը՝ հասցնելով 4-5 մարդու։ Նրանցից ոմանք նախագահական արշավում Թրամփի նախկին մրցակիցներն են։
