Նախագահ Սերժ Սարգսյանը մայիսի 31-ին աշխատանքային այցով ժամանել է Ղազախստանի Հանրապետություն՝ մասնակցելու Աստանայում կայանալիք Եվրասիական տնտեսական բարձրագույն խորհրդի նիստին:
«Ժառանգություն» կուսակցության փոխնախագահ Արմեն Մարտիրոսյանի խոսքով՝ ճիշտ դեմարշ կլիներ Սերժ Սարգսյանի կողմից, եթե ընդհանրապես Աստանա չգնար, քանի որ Երևանում նախատեսված ԵՏՄ անդամ երկրների վարչապետների հանդիպման չկայացման նախաձեռնությունը Ղազախստանինն էր: «Կարելի էր չգնալ և ցույց տալ, որ այդպիսի գործընկերություն չի լինում,- «Առաջին լրատվական»- ի հետ զրույցում նշեց Ա. Մարտիրոսյանը:
Աստանայում Ս. Սարգսյանը հանդես է եկել ծավալուն ելույթով, որտեղ անդրադարձել է նաև ղարաբաղյան հիմնախնդրին, ինչպես նաև դրա հետ կապված ԵՏՄ անդամ երկրների դիրքորոշմանը: Նա մասնավորապես նշել է, որ Հայաստանը չի կարող անմասն մնալ, եթե Ադրբեջանի կողմից ԼՂՀ-ի նկատմամբ ագրեսիվ գործողություններ լինեն: Ա. Մարտիրոսյանի կարծիքով՝ նախագահն իր ելույթում պետք է նշեր նաև, որ Ադրբեջանը նաև Հայաստանի սահմանների նկատմամբ է ոտնձգություն իրականացնում, և որ Ադրբեջանի գործողությունները ոչ միայն ԼՂՀ-ին ուղղված, այլ նաև Հայաստանի դեմ ուղղված գործողություններ են՝ օրինակ բերելով Նախիջևանում սպառազինության կուտակումը:
«Ես ցանկանում եմ տեսնել, որ պետությունը ներկայացնողը ողնաշար ունեցող քաղաքականություն վարի և անհրաժեշտ պահին նաև ատամ ցույց տա»,- նշեց Ա. Մարտիրոսյանը:
Նրա կարծիքով՝ Հայաստանը պետք է վերանայի ոչ միայն ԵՏՄ-ին, այլ նաև ՀԱՊԿ-ին անդամակցությունը. «ՀԱՊԿ-ը հայտարարում է, որ պոլսովետական տարածքում իրենք որևէ պետության դեմ գործողություն չեն իրականացնելու, Ադրբեջանի նկատմամբ, նույնիսկ ՀԱՊԿ քարտուղարն էր նշել, որ իրենք որևէ գործողություն չեն իրականացնելու: Հայաստանն այդ դեպքում ՀԱՊԿ-ում ի՞նչ գործ ունի»:
«Բոլոր ցուցանիշները վատացել են, Ռուսաստանի հետ հարաբերությունները թող շարունակեն, բայց այդ երկու կառույցներից դուրս գան»,- նշում է Ա. Մարտիրոսյանը՝ հավելելով, որ նորից եվրոպական դուռը բացվել է Հայաստանի համար, պետք է ԵՄ-ի հետ կնքել պայմանագրեր, և տնտեսությունը նորմալ զարգացում կունենա:
Անդրադառնալով դիտարկմանը, որ մեր երկրում մենաշնորհների օրինականացման գործընթաց է սկսվել, որը մեզ չեն պարտադրում ո՛չ ԵՏՄ, և ո՛չ էլ առավել ևս ԵՄ-ն, Ա. Մարտիրոսյանն արձագանքեց. «Արտաքին քաղաքականությունը ներքին քաղաքականության շարունակությունն է, եթե մենք մեր ներքին խնդիրները կարգավորենք, արտաքին խնդիրներն էլ կլուծվեն»:
Մանրամասները՝ տեսանյութում:
