ԱՄՆ նախագահ Բարաք Օբաման երկօրյա պաշտոնական այցով ժամանել է Բեռլին, որտեղ Գերմանիայի կանցլեր Անգելա Մերկելի հետ մի շարք հարցեր է քննարկել:
Երկու ղեկավարներն էլ պատրաստակամություն են հայտնել «համատեղ ուժերով հաղթահարել ժամանակակից աշխարհի նոր մարտահրավերները»: Համատեղ մամլո ասուլիսում Անգելա Մերկելն ասել է, որ ԱՄՆ-ի և Գերմանիայի միջև հարաբերությունները հարթ են: ԳԴՀ կառավարության ղեկավարն ԱՄՆ-ի և Եվրամիության միջև ազատ առևտրի գոտու ստեղծումն անվանել է «խոշոր նախագիծ»:
Մերկելը նաև դրական է գնահատել Մերձավոր Արևելքում խաղաղ կարգավորման հարցում առաջընթացի հասնելու ԱՄՆ-ի նախաձեռնությունը:
Աֆղանստանի վերաբերյալ խոսելով՝ ԱՄՆ-ը ղեկավարն ընդգծել է, որ հաշտեցման գործընթացին պետք է մասնակցեն հակամարտության բոլոր կողմերը, այդ թվում՝ «Թալիբան» շարժման ներկայացուցիչները:
Ինչ վերաբերում է Սիրիայի խնդրին, Օբաման ընդգծել է, որ ԱՄՆ-ը «մտադիր չէ թույլ տալ քիմիական զենքի կիրառումը և դրա հայտնվել այն մարդկանց ձեռքերում, ովքեր կարող են այդ զենքն օգտագործել»:
Օբաման ասել է նաև, որ, իր կարծիքով, «Բաշար Ասադը կորցրել է օրինական իշխանությունը պահպանելու իր հնարավորությունը: Ես չեմ կարող մեկնաբանություններ տալ մեր՝ գրոհայիններին աջակցելու առնչությամբ»,- հավելել է նա:
Մերկելն, իր հերթին, ևս մեկ անգամ ընդգծել է, որ ԳԴՀ-ն զենք չի մատակարարի Սիրիայի գրոհայիններին:
Մամլո ասուլիսի ընթացքում Բարաք Օբաման նաև հաստատել է Գուանտանամոյի բանտը փակելու իր մտադրությունը:
ԳԴՀ կանցլերը և ԱՄՆ նախագահը խոսել են նաև աղմկահարույց «էլեկտրոնային լրտեսության» մասին: Օբաման ասել է, որ այդ ծրագիրն իրականանում է միայն իրավական հիմքերով և քաղաքացիներին պաշտպանելու նպատակով: «Դա գաղտնալսում չէ»,- նշել է նա:
