Հայաստանյան և ռուսական լրատվամիջոցներում բավականին ակտիվ շրջանառվող խոսակցությունները՝ Հայաստանի ռուսական ռազմաբազաներում ՌԴ-ի կողմից «Իսկանդեր-М» տեսակի հարվածային հրթիռային համալիրների տեղակայման մասին, ավելի հիմնավոր են դառնում: Թեև շրջանառվող տեղեկությունները չեն հաստատվում համապատասխան մարմինների կողմից, որոշ շրջանակներ տեղեկություններ են տարածում, թե Գյումրիում ՌԴ 102-րդ ռազմաբազան համալրվել է հեռահար ու գերճշգրիտ զինատեսակներով, հրթիռներով, որոնց հեռահարությունը մոտ 300 կիլոմետր է։ Հայաստան է բերվել նաև «Իսկանդեր-М» տեսակի հարվածային հրթիռային համալիր, որի հեռահարությունն ավելի քան 400 կիլոմետր է, որոնք նորագույն զինատեսակներ են և աշխարհում դասվում են ծանր հրետանիների շարքին։
Մի շարք ռազմական փորձագետերի կարծիքով՝ ՀՀ-ին սպառնացող արտաքին վտանգը համարժեք չէ «Իսկանդեր-М»-ի հզորությանը, և այս կերպ Ռուսաստանն իր խնդիրն է լուծում տարածաշրջանում:
Հարցը, թե կարո՞ղ է արդյոք այս զինատեսակի թիրախում Վրաստանը լինել, «Առաջին լրատվական»-ը քննարկեց Ռազմավարական և միջազգային հետազոտությունների վրացական հիմնադրամի տնօրեն, վրացի քաղաքական վերլուծաբան Ալեքսանդր Ռոնդելիի հետ:
Նա նշեց, թե հստակ քննարկման առարկա չէ այն, թե ՌԴ-ն տեղակայել է Հայաստանում այսօր նման զինատեսակ: Բայց, ըստ նրա, եթե Հայաստանում այսօր կա նման զինատեսակ, այն Վրաստանի համար սպառնալիք չէ:
«Վրաստանի դեմ այդ զինատեսակն օգտագործվել է 2008 թ. ռուս-վրացական պատերազմի ժամանակ, ուստի ՌԴ-ն հարաբերությունների սրացման դեպքում Վրաստանին կարող է նաև հրթիռակոծել Հարավային Օսեթիայից և Հարավային Կովկասից, ինչպես 2008 թ.: Ուստի կարծում եմ, որ Հայաստանում «Իսկանդեր M»-ը որևէ հատուկ բան չի փոփոխում: Իսկ թե որ երկիրն է այդ զինատեսակի թիրախը, չեմ կարող ասել: Թուրքիան էլ չի կարող լինել, քիչ հավանական է նման բան»,- մեկնաբանեց Ալեքսանդր Ռոնդելին:
