Բրազիլիայի Սան Պաուլու քաղաքում ցուցարարների խմբերը ոստիկաններին դուրս են մղել քաղաքի կենտրոնական շրջաններից և ավերածություններ են կազմակերպել՝ հաղորդում է RIA Novosti-ն:
Հիշեցնենք, որ երկուշաբթի ուղեվարձերի բարձրացման դեմ բողոքի ակցիաներ են տեղի ունեցել Բրազիլիայի 11 քաղաքներում, այդ թվում՝ մայրաքաղաք Բրազիլիայում: Փողոց էին դուրս եկել ավելի քան 250 հազար մարդ: Բրազիլացիները դժգոհ են նաև կրթության և առողջապահության ոլորտների ոչ բավարար ֆինանսավորումից:
Երեքշաբթի երեկոյան ցուցարարները փորձել են գրավել Սան Պաուլուի քաղաքապետարանի շենքը, սակայն ոստիկանները թույլ չեն տվել: Ավելի ուշ նրանք ստիպված են եղել հեռանալ այդ շրջանից ագրեսիվ տրամադրված բազմության թվային գերակշռության պատճառով: Դիմադրության չհանդիպելով՝ ցուցարարները ավերել են մի քանի բանկեր, խանութներ, այրել են հեռուստաալիքներից մեկին պատկանող մեքենան: Քաղաքապետարանի շենքի վրա նրանք քարեր են նետել՝ կոտրելով ապակիները:
ԶԼՄ-ների փոխանցմամբ՝ ձերբակալվել է 8 մարդ: Սան Պաուլու և Ռիո դե Ժանեյրո քաղաքների ղեկավարությունները ներկայում քննարկում են երթևեկության ուղեվարձերը նվազեցնելու հնարավորությունը:
