Կառավարության վերջին նիստը կրկին նշանավորվեց վարչապետ Հովիկ Աբրահամյանի հանձնարարականով՝ ուղղված ֆինանսների նախարարությանը: Նա հանձնարարեց գնումների գործընթացում հնարավոր կոռուպցիոն ռիսկերի նվազեցման նպատակով առավել բարելավել թափանցիկությունն այդ գործընթացի տարբեր փուլերում՝ հնարավորություն ընձեռելով յուրաքանչյուր հետաքրքրվող անձի էլեկտրոնային գնումների կայքէջում տեսնել գնումների գործընթացի արդյունքում կնքված բոլոր պայմանագրերը, ինչպես նաև կնքված պայմանագրերի կատարման արդյունքները, ընդունման-հանձնման ակտերը, կատարողական ակտերը, հաշիվ-ապրանքագրերը և այլն:
«Թրանսփերենսի ինթերնեյշնլ» հակակոռուպցիոն կենտրոնի գնումների մոնիտորինգի փորձագետ, տնտեսագետ Արտակ Մանուկյանն անդրադառնալով այս հանձնարարականին՝ հիշեցրեց 2014 թվականին կրկին կառավարության նիստում արված վարչապետի գրեթե նույն բովանդակությամբ ևս մեկ հայտարարություն, որում վարչապետը «ատկատների» արմատացած արատավոր երևույթի դեմ պայքարը պատկերացնում էր գնումների համակարգի վերջնական ավտոմատացմամբ, թափանցիկության ապահովմամբ:
Թե ինչ փոփոխություններ կարձանագրվեն 2 տարի առաջ վարչապետի կողմից արդեն հնչեցված նույն հանձնարարականից հետո՝ Մանուկյանը դժվարանում է կանխագուշակել, սակայն ներկայացնում է մի շարք բացահայտումներ, որոնք ի հայտ են եկել «Թրանսփերենսի ինթերնեյշնլ» հակակոռուպցիոն կենտրոնի ուսումնասիրությունների արդյունքում:
Վանաձորում գրանցված «Անանո» ՍՊԸ-ից, օրինակ, ԱԱԾ-ն ձեռք է բերել միաժամանակ և սննդամթերք, և գրասենյակային գույք, և լվացքի պարագաներ: Ի դեպ, այս ընկերության անբարեխիղճ աշխատանքի վերաբերյալ նախկինում հայտարարություն էր տարածել Երևանի քաղաքապետարանը:
Ֆինանսների նախարարությունն էլ 2015 թվականի դեկտեմբերին ձեռք է բերել 30 հատ պլանշետային համակարգիչներ՝ հատը մոտավորապես 400 հազար դրամով, սակայն որևէ տեղ նշված չէ, թե ինչ նպատակով են դրանք օգտագործվելու:
Մանուկյանը մանրամասնում է, որ նման օրինակները բազմաթիվ են, և ընդգծում՝ որքան մեծ են գերատեսչության բյուջետային հատկացումները, այնքան շատ են կասկածելի գնումներն ու կոռուպցիոն ռիսկերը:
