«Իմ ասածները կարելի է տարբեր կերպ մեկնաբանել»,- քիչ առաջ ՀՀ Ազգային ժողովի արտահերթ նստաշրջանի առաջին նիստում հայտարարեց ՀՀ փոխվարչապետ Արմեն Գևորգյանը՝ պատասխանելով ՀԱԿ պատգամավոր Նիկոլ Փաշինյանի հարցին: Վերջինս հետաքրքրվեց, թե ինչ է նա ասելու ՎՊ հաշվետվության կապակցությամբ այն դեպքում, որ եթե ընդունենք ՎՊ հաշվետվությունը, ՀՀ կառավարությունը պետք է հրաժարական տար: Իսկ եթե դա տեղի չի ունեցել, ապա, ըստ պատգամավորի, ՀՀ կառավարությունը շարունակելու է նույն թափով:
Փաշինյանը նշեց, որ խորհրդարանական մեծամասնության գնահատմամբ՝ խախտումները ոչ զանգվածային են, իսկ ընդդիմությունը զանգվածաբար է փոշիացնում պետական միջոցները:
«Սերժ Սարգսյանի՝ 2012թ. սեպտեմբերի 15-ին անցկացրած հայտնի խորհրդակցությունը ավելի կոշտ էր, քան ասում է ՎՊ նախագահը. խոսքը սեպտեմբեր ամսի մասին է: Այսինքն՝ նույն ժամանակահատվածի վերաբերյալ էր այդ երկու նույն գնահատականները: Այդ ինչպե՞ս եղավ, որ քառամյա գործունեությունը ատկատների, չարաշահումների առումով գնահատվել է խիստ բացասական և հետո շարունակում է կառավարել: Շատ կոնկրետ հանձնարարական կար՝ գլխից բռնելու, իսկ Դուք ասում եք, որ Վայոց ձորի գյուղատնտեսության վարչության պետն է պատասխանատվության ենթարկվել:
Դուք մամուլում առկա հրապարակումների համաձայն՝ «Տոյոտա Արմենիա»-ի սեփականատերն եք, պետական գնումներ են կատարում այդ ընկերությունից, ուստի շահույթ եք ստանում նաև Դուք: Դա էլ ատկատի ձևերից մեկն է: Լրիվ օրինական ճանապարհով շահույթ եք ստանում»,- նման դիտարկում արեց Նիկոլ Փաշինյանը:
Արձագանքելով հարցին՝ փոխվարչապետն ասաց, որ այդ հարցի կապակցությամբ հարց էր ուղղել «Հայկական ժամանակ» օրաթերթի թղթակիցը, ով ստացել էր բացասական պատասխան: Ի դեպ, նրա խոսքով՝ պետական համակարգում այլ դիստրիբյուտորներից ևս գնվում են ավտոմեքենաներ: Ի պատասխան՝ Նիկոլ Փաշինյանը պնդեց, որ այդ մասին նշված էր նույնիսկ վիկիլիքսյան փաստաթղթերում:
