Ավելի վաղ տեղեկացրել էինք, որ ՄԱԿ-ի Գլխավոր ասամբլեան ընդունել է Վրաստանի կողմից՝ քվեարկության համար առաջարկված բանաձև` Աբխազիայի և Հարավային Օսեթիայի վերաբերյալ` նվիրված փախստականների խնդրին:
Այդ բանաձևին կողմ է քվեարկել 62, դեմ` 16 երկիր, այդ թվում՝ Հայաստանը և Ռուսաստանը։ Ձեռնպահ են մնացել 84-ը: Բանաձևի համաձայն՝ փախստականները հնարավորություն կունենան վերադառնալ իրենց բնակության վայրեր՝ Աբխազիա և Հարավային Օսեթիա:
Հայաստանի կողմից դեմ քվեարկելը տարաբնույթ քննարկումների տեղիք տվեց ինչպես այստեղ, այնպես էլ Վրաստանում․ հատկապես այնտեղ շատերը քննադատորեն մոտեցան այսօրինակ որոշմանը:
«Առաջին լրատվական»-ի հետ զրույցում Վրաստանի «Բազմազգ Վրաստան» քաղաքացիական նախաձեռնության ղեկավար Առնոլդ Ստեփանյանն, անդրադառնալով Հայաստանի՝ դեմ քվեարկելուն, ասաց․ «Հայաստանը պետք է գիտակցի, որ երբ ինչ-որ քայլ է անում, դրա մասին մյուսները հաստատ համապատասխան դատողություն և հետևություններ են անում: Հասկանալի է, որ Հայաստանն իր շահերն է պաշտպանում՝ միևնույն ժամանակ հաշվի առնելով այն հանգամանքը, որ Ռուսաստանի հետ ռազմավարական գործընկեր է, բայց շատ կարևոր է, որ Հայաստանը փորձի հաշվի առնել նաև իր մյուս գործընկերոջ, հարևան երկրի՝ Վրաստանի շահերը: Եթե Հայաստանի հետաքրքրությունների շրջանակներում չեն Վրաստանի շահերը, ապա գոնե պետք է այնպես անի, որ դրանք այսպիսի արձագանք չունենան Վրաստանում»:
Ա․ Ստեփանյանը հավելեց, որ Հայաստանի այդ քայլը Վրաստանում վատ արձագանք է ստացել։ Ըստ նրա՝ ճիշտ է, քաղաքական իմաստով գործողություն և հայտարարություն չի եղել, բայց հասարակության շրջանում քննարկումների տեղիք է տվել։ «Վրացի ազգը միշտ այն սպասումով է, որ Հայաստանը կպաշտպանի իրեն»,- նշեց Ստեփանյանը:
Մեր հարցին` հնարավո՞ր է հայ-վրացական հարաբերություններն այս պատճառով տուժեն, Առնոլդ Ստեփանյանը պատասխանեց․ «Սա առաջին անգամը չէ, ես չեմ կարծում, որ կտրուկ անկում լինի։ Հնարավոր է՝ կարճաժամկետ վատթարացում լինի»:
