Հյուսիսային Կորեայի առաջնորդ Կիմ Չեն Ինը կոչ է արել ամրապնդել Չինաստանի հետ կապերը՝ Չինաստանի նախագահ Սի Ցզինպինին շնորհավորելով ծննդյան 60-ամյակի կապակցությամբ: Այս մասին հայտնում է «Ռենհապ» գործակալությունը:
«Մեր կուսակցության ու ժողովրդի հաստատուն կամքն է ավանդական կորեա-չինական ընկերության հետագա ամրապնդումն ու զարգացումը՝ երկարաժամկետ և ռազմավարական տեսակետից, չնայած միջազգային բարդ իրադրությանը»,- ընդգծել է Կիմ Չեն Ինը:
Չինաստանն ավանդաբար եղել է Հյուսիսային Կորեայի գլխավոր դաշնակիցը և տնտեսական օգնության ու դիվանագիտական պաշտպանության հիմնական աղբյուրը:
Վերջին ամիսներին, սակայն, Չինաստանը փոխել է իր վերաբերմունքը՝ Փխենյանի կողմից բալիստիկ հրթիռների արձակումից և փետրվարին երրորդ միջուկային փորձարկման իրականացումից հետո: Պեկինն այդ ժամանակ աջակցություն էր հայտնել Հյուսիսային Կորեայի դեմ ՄԱԿ-ի պատժամիջոցներին:
