Սիսիանի դատախազության նախկին աշխատակիցը Aravot.am-ին Սյունիքի նախկին մարզպետ Սուրիկ Խաչատրյանի 90-ականների գործունեության մասին նոր տեղեկություններ է ներկայացրել:
Նրա պատմելով՝ 1994-95 թվականներին Ս. Խաչատրյանը չնչին կոպեկներով իր հարազատներին է վաճառել Գորիսում գտնվող ու այդ ժամանակին գործող Էներգետիկ մի մեծ պետական կառույց:
Հետագայում, երբ քաղսովետի նախագահ էր, այդ նույն կառույցը տասնապատիկ թանկ գներով էներգոցանցին վերավաճառեցին: Նրա խոսքերով, դեպքի առթիվ Գորիսի դատախազությունում քրեական գործ էր հարուցվել, բայց կարճ ժամանակ հետո կարճվեց:
Դատախազության նախկին աշխատակցի խոսքերով, Սուրիկ Խաչատրյանին այդ տարիներին հովանավորում էին ՀՀՇ-ականները. «Սա ոչ թե մի օրում այդպիսին դարձավ, այլ հենց հեղափոխութան՝ ՀՀՇ-ի իշխանության գալու օրվանից: Նա այն ժամանակ մոտ էր և Լևոն Տեր-Պետրոսյանի, և Վանո Սիրադեղյանի, ՀՀՇ-ական պատգամավորների հետ, որոնց հետ գնացել էին Զոռզոռ ուտել-խմելու, որտեղ էլ հղի կնոջ նկատմամբ սպանության փորձ կատարվեց: Լևոն Զուրաբյանը, որ ասում է՝ Սուրիկ Խաչատրյանը սերտաճել է իշխանության հետ, ես էլ ասում եմ՝ այդ սերտաճումը եկել է Լևոն Տեր-Պետրոսյանի օրոք և սերտաճել է առայսօր: Այս երկիրը երկիր կդառնա միայն այն ժամանակ, երբ ՀՀՇ-ի քաղաքական աղբանոցից ոչ ոք չդառնա ղեկավար այս երկրում: Սուրիկ Խաչատրյանը կռված տղա է, բան չունեմ ասելու, բայց նրանք են մեղավոր, որոնք այդ կռված, ազնիվ մարդկանց որպես բութ գործիք բերեցին քաղաքականություն, երբ նրա նմանները պետք էին, որ ամեն տեղ կեղծեին, թալանեին ու ահաբեկեին: Հո նախագահը չէր թալանելու: Նախագահը մեկով պետք է կատարեր այդ գործը»:
