«Ռեալ Մադրիդ» – «Մանչեսթեր Սիթի»(1:0) խաղից հետո թիմերի գլխավոր մարզիչներն անդրադարձել են հանդիպմանը:
Հիշեցնենք, որ «արքայական» ակումբը, առավելության հասնելով նվազագույն հաշվով, նվաճեց Չեմպիոնների լիգայի եզրափակիչի ուղեգիր, որտեղ բաղձալի տիտղոսի համար պայքարելու է մադրիդյան մյուս թիմի՝ «Ատլետիկո»-ի հետ:
«Բարդ էր լինելու՝ մենք հասկանում էինք, սակայն կարողացանք առաջ շարժվել: Կրիշտիանուն այսօր սովորականի պես էր: Ես գոհ եմ պաշտպանական գոտու բոլոր ֆուտբոլիստների խաղից: Մենք եզրափակիչում ենք, բայց դա դեռ տիտղոս չէ:
Սա իսկապես կարևոր օր է մեզ համար: Ես երջանիկ եմ, բայց ոչ այնքան ինձ համար, որքան ֆուտբոլիստներիս, ովքեր հիանալի աշխատանք կատարեցին: Կիսաեզրափակիչներում միշտ էլ բարդ է, բայց եզրափակիչ դուրս գալն է կարևորը:
Հասկանում ենք, որ մայիսի 28-ին մեզ շատ բարդ հանդիպում է սպասվում, սակայն հիմա պետք է հանգստանանք ու մտածենք կիրակի կայանալիք խաղի մասին: Ես շատ ուրախ եմ, որ այսպիսի ֆուտբոլիստներ մարզելու հնարավորություն ունեմ: Նրանցից յուրաքանչյուրն ինձ համար կարևոր է: Պետք է շարունակենք աշխատել միասին ու հավատել, որ կարելի է կրկնել հաջողությունները: Այսօր մենք դա արեցինք:
Այո՛, ես մարզիչ եմ, և որոշ բաներ պայմանավորված են նաև ինձնով, բայց հիմնական գործառույթը ֆուտբոլիստներն են կատարում, իսկ ինձ խաղը վայելելու հնարավորություն են տալիս: Ես երջանիկ եմ՝ տեսնելով այն, թե ինչպես են նրանք աշխատում: Հարկավոր է յուրաքանչյուր օր ապրել լիարժեք, քանի որ այն կարող է վերջինը լինել մեզ համար»,- ՈւԵՖԱ-ի պաշտոնական կայքը փոխանցում է Զիդանի խոսքը:
«Մեզ չբավարարեց Սիլվայի ու Նասրիի բացակայությունը, իսկ Տուրեն նոր է ապաքինվել վնասվածքից: Կարծում եմ՝ թիմերից և ոչ մեկը չարժանացավ եզրափակիչին: Երկու թիմերի կողմից էլ ջանքերը շատ էին, ֆուտբոլը՝ քիչ: Երկու խաղն էլ անցավ հավասար պայքարում: Նրանց պաշտպանությունն ավելի ուժեղ էր, քան հարձակումը:
Իհարկե, եթե եզրափակիչում չես, ուրեմն՝ բաց ես թողել հնարավորությունը: Մենք մրցում էինք ուժեղ թիմի դեմ, բայց չեմ կարծում, թե նրանք ինչ-որ բանով առավել էին մեզնից: Ուղղակի մեզ հաջողությունը չժպտաց: Փորձեցինք, բայց չեղավ: Չեմ կարծում, թե «Ռեալ»-ն այս երկու խաղերի արդյունքում ապացուցեց, որ ուժեղ է «Սիթի»-ից:
Յուրահատուկ մրցաշրջան էր մեզ համար, քանի որ մենք կարողացանք հասնել մինչև կիսաեզրափակիչ, իսկ դա շատ կարևոր էր թիմի համար: Մենք շարունակելու ենք պատրաստվել ու պայքարել մեր հաջորդ շանսի համար: Այս թիմը միշտ պետք է ձգտի եզրափակիչի:
Եզրափակիչում ֆավորիտ չկա. «Ատլետիկո»-ն շատ ուժեղ է, իսկ «Ռեալ»-ում այնպիսի ֆուտբոլիստներ կան, որ կարող են մի քանի րոպեում ամեն ինչ ոտքից գլուխ շուռ տալ»,- ՈւԵՖԱ-ի պաշտոնական կայքը փոխանցում է Մանուել Պելեգրինիի խոսքը:
