«Սերժ Սարգսյանն իր երեք տարվա քաղաքականության արդյունքում հանգել է կատարյալ ձախողման: Նա առաջին հերթին լիակատար ձախողման է հանգել տնտեսական քաղաքականության բնագավառում և արդյունքում չափազանց մեծացել է սոցիալական բունտի վտանգը: Այս վտանգին դիմադրելու, վատթարագույնից խուսափելու համար էլ Սերժ Սարգսյանը փորձել է այս գործընթացի մեջ մտնել ու կասեցնել մարտ-ապրիլ ամսին հասունացած սոցիալական պայթյունի վտանգը: Իսկ այդ խնդրի լուծման գինը քաղբանտարկյալների ազատ արձակումն է, որը Սերժ Սարգսյանը ստիպած է լինելու վճարել»,- մեզ հետ զրույցում հայտարարեց քաղաքագետների միության նախագահ, ԱԺ նախկին պատգամավոր Հմայակ Հովհաննիսյանը:
Վերջինս համոզված է, որ դրանով ավարտվելու է իշխանություն-ընդդիմություն երկխոսությունը: «Սերժ Սարգսյանը դրանից ավելի զիջումների չի գնա: Սա ակնհայտ է: Նա հոժար կամքով չի գնա արտահերթ ընտրությունների: Բայց ամեն ինչ պայմանավորված կլինի Կոնգրեսի ունակությամբ` պարտադրել այս լուծումը, իսկ արտահերթ ընտրություններ պարտադրելու համար Կոնգրեսին անհրաժեշտ կլինի բարձրացնել հզոր ալիք»,- կարծում է Հմայակ Հովհաննիսյանը: