«Հրապարակ»-ը զրուցել է ԱԺ ԲՀԿ-ական պատգամավոր Հարություն Ղարագյոզյանի հետ: Ներկայացնում ենք հարցազրույցից մեկ հատված:
– Պարոն Ղարագյոզյան, Դուք ի՞նչ պատճառով անհետացաք կառավարության ծրագրի քվեարկության ժամանակ: Ինչո՞ւ չքվեարկեցիք այդ ծրագրի դեմ, ինչպիսի որոշում ուներ խմբակցությունը:
– Ես քվեարկության պահին ընդամենը դուրս եմ եկել, պայմանավորվածություն ունեի՝ դուրս եմ եկել:
– Իսկ կարելի՞ է իմանալ՝ ի՞նչ լուրջ պայմանավորվածություն էր, որը գերադասեցիք այդ կարևոր քվեարկությունից:
– Ես ասում եմ, որ դուրս եմ եկել, և վերջ:
– Իսկ եթե ներսում լինեիք, դեմ էիք, չէ՞, քվեարկելու:
– Էդ արդեն կերևար:
– Այսինքն՝ խմբակցության որոշումները Ձեզ համար դեռ վիճարկելի՞ են:
– Խմբակցությունը ոնց որոշում ա, մենք ըտենց էլ քվեարկում ենք:
– Պարոն Ղարագյոզյան, Ծառուկյանը հայտարարեց, որ ԲՀԿ-ն ընդդիմություն չի դառնա…
– Հա, ինքը մի քանի անգամ ասել է նաև, որ մենք այլընտրանք ենք:
– Ձեր, ինչպես նաև իշխանության հետ ջերմ հարաբերություններ ունեցող ԲՀԿ-ականների համար ընդունելի չէ, փաստորեն, այդ այլընտրանքությունը, և դուք պարբերաբար կանգնում եք նման երկընտրանքների առջև, չեք պատրաստվում Ծառուկյանին ասել, որ կամ իշխանություն, կամ ընդդիմություն դառնաք:
– Ոչ, խմբակցությունը ոնց որոշում է, մենք հավատարիմ ենք այդ դիրքորոշմանը:
– Եթե ընդդիմադիր չեք, ինչո՞ւ դեմ քվեարկեցիք կառավարության ծրագրին:
– Այդ հարցը պարոն Ծառուկյանին տվեք:
– Ըստ Ձեզ, նորմալ ապրելու համար որքա՞ն գումար է հարկավոր ընտանիքին (Ազգային ժողովի այս քառօրյայի օրակարգ է ընդգրկվել «Նվազագույն ամսական աշխատավարձի մասին» օրենքում փոփոխություններ ու լրացումներ կատարելու մասին» օրինագիծը: Ըստ այդմ՝ հուլիսի 1-ից Հայաստանում նվազագույն աշխատավարձը կբարձրանա 10 հազար դրամով՝ այսօրվա 35 հազար դրամի փոխարեն կազմելով 45 հազար դրամ):
– Նայած մարդ ոնց ա ապրում, ինչ պայմաններում:
– Դե, նորմալ ապրելու համար, օրինակ Ձեզ որքա՞ն է հարկավոր:
– Դե մի 100-150 հազար դրամը բավական ա:
– Ձեր ընտանիքն այդքան գումարով ապրո՞ւմ է մեկ ամիս:
– Հա 230 հազար ստանում եմ, հարյուրն էլ տնտեսում եմ:
Հարցազրույցն ամբողջությամբ կարդացեք «Հրապարակ»-ի այսօրվա հմարում:
