«Հըզբոլլահ» լիբանանյան շարժման գրոհայինները Սիրիայում կառավարական զորքերին օգնել են արդյունավետ պայքարել ապստամբների դեմ, սակայն լուրջ կորուստներ են կրել: Այս մասին RIA Novosti գործակալությանը հայտնել է Վաշինգտոնի Մերձավոր Արևելք ինստիտուտի փորձագետ, ԱՄՆ Պետդեպարտամենտի Մերձավոր Արևելքում և Հարավային Ասիայում հետախուզության գրասենյակի տնօրենի նախկին տեղակալ Ուեյն Ուայթը:
«Հաշվի առնելով մարտական գործողությունների թափը և Սիրիայից եկող հաղորդագրությունները՝ կարելի է ենթադրել, որ Սիրիայի կառավարական զորքերի ռազմական գործողություններին այժմ մասնակցում են «Հըզբոլլահ»-ի մի քանի հազար ներկայացուցիչներ»,- ասել է Ուայթը:
Նրա խոսքով՝ ունենալով մարտական փորձ՝ շարժման կողմնակիցները շատ գործողություններ անցկացնում են ավելի մեծ արդյունավետությամբ, քան Սիրիայի կանոնավոր բանակը, որը լուրջ կորուստներ է կրել ընդդիմության դեմ ավելի քան երկու տարի շարունակվող մարտերում:
Փորձագետը նշել է, որ շարժման գրոհայինները կռվել են Ալ-Կուսեյրում:
«Լիբանանի շարժման վերահսկողության տակ գտնվող շրջանում գերեզմանների թիվը վկայում է այն մասին, որ քաղաքի համար մարտերում նրանք շատ բան են զոհաբերել: Նման ինտենսիվ զինված բախումներում, որտեղ դիմակայությանն ավելացել է կրոնական խմբավորումների թշնամանքը, ամենայն հավանականությամբ՝ իրագործվել են ռազմական հանցագործություններ: Մենք ուղղակի հստակ թվեր չգիտենք»,- ասել է Ուայթը:
Գործակալության զրուցակցի կարծիքով՝ արտասահմանյան զինված խմբավորումները, հավանաբար, կշարունակեն մասնակցել սիրիական հակամարտությանը: Ուայթը կարծում է, որ «Հըզբոլլահ»-ը կկրճատի իր մասնակցությունը սիրիական հակամարտությանը այն դեպքում, եթե կորուստները չափազանց մեծ լինեն, կամ եթե մարտերը տեղափոխվեն Լիբանանի տարածք:
