«Թաքսիմ հարթակ» հասարակական շարժումն այսօր կշարունակի բողոքի հանրահավաքը՝ իրենց առաջադրած պահանջների նկատմամբ կառավարության արձագանքի բացակայության պատճառով: Այդ մասին կազմակերպության ներկայացուցիչները հայտարարել են շաբաթ երեկոյան՝ հիշեցնելով, որ պահանջների տեքստը փոխանցվել է փոխվարչապետ Բյուլենթ Արընչին՝ հունիսի 5-ին նրա հետ Անկարայում հանդիպման ժամանակ: Այս մասին հայտնում է ITAR-TASS-ը:
Կազմակերպության ներկայացուցիչները նշում են, որ ոչ մի պահանջ չի կատարվել, չի իրականացվել նաև ոչ մի հստակ քայլ: Նրանք հայտնում են, որ ոստիկանական բռնությունը շարունակվում է: Ցուցարարները պահանջում են կասեցնել Ստամբուլի կենտրոնական հրապարակին կից Գեզի այգու վերակառուցման ծրագրերը, հեռացնել Ստամբուլի, Անկարայի և Հաթայի նահանգապետերին ու անվտանգության վարչության տնօրեններին, որոնց պատասխանատու են համարում 3 ցուցարարների մահվան համար և մեղադրում մարդկանց հիմնական ժողովրդավարական իրավունքների խախտման մեջ:
Անցած գիշեր Ստամբուլի Գեզի շրջանում բախումներ են տեղի ունեցել ցուցարարների և ոստիկանների միջև: Բախումներ են գրանցվել նաև Ադանայում: Իրավապահներն արցունքաբեր գազ և ջրցան մեքենաներ են գործի դրել:
Թաքսիմում շարունակվում են նաև երկրի երեք խոշոր ֆուտբոլային ակումբների՝ «Բեշիքթաշի», «Ֆեներբախչեի» և «Գալաթասարայի» երկրպագուների զանգվածային ցույցերը: Հազարավոր երկրպագուներ իրենց աջակցությունն են ցուցաբերում ցուցարարներին: Համանման ակցիա է անցկացվել նաև Իզմիրում:
Ելույթների ֆոնին իշխող «Արդարություն և զարգացում» կուսակցությունը հայտարարել է, որ հուլիսի 15-ին և16-ին Ստամբուլում և Անկարայում հանրահավաքի կհրավիրի իր կողմնակիցներին:
Իրավիճակին արձագանքել է նաև Նոբելյան մրցանակակիր, թուրք գրող Օրհան Փամուկը: Նա հայտարարել է, որ անհանգստացած է հանրապետության ապագայով:
«Կառավարությունը իրադրության խաղաղ կարգավորման ոչ մի ազդանշան չի տալիս՝ կապված ցույցերի հետ: Դա ինձ շատ է անհանգստացնում: Ես հարգում եմ ցուցարարների ցասումը: Թաքսիմի վերաբերյալ որոշումը պետք է ընդունվի միասին»,- ասել է Փամուկը:
