Թուրք գրող, Նոբելյան մրցանակի դափնեկիր Օրհան Փամուկը ելույթ է ունեցել՝ ի պաշտպանություն ցուցարարների, ովքեր 12 օր շարունակ Թուրքիայի տարբեր քաղաքներում հակակառավարական ցույցեր են կազմակերպում: Այս մասին հաղորդում է Hurriyet թերթը:
«Յուրաքանչյուր ոք, ով ապրում է Ստամբուլում, հաստատ անմոռանալի հիշողություններ ունի՝ կապված այդ հրապարակի (Թաքսիմ) հետ: Ես հասկանում եմ այդ մարդկանց: Ամբողջ աշխարհն է նրանց հասկանում: Թուրքիայում կարևոր իրադարձություններ են տեղի ունենում, որոնք ինձ շատ են հուզում: Ես անհանգստանում եմ Թուրքիայի ապագայի համար և հուսահատված եմ, որ ոչ մի ազդանշան չկա այն բանի, որ ցուցարարների և կառավարության միջև խաղաղ ճանապարհով որևէ որոշում կկայացվի»,- ասել է Փամուկը:
Նրա կարծիքով՝ կառավարությունն ավելի մեղմ քաղաքականություն պետք է վարի: «Ենթադրում եմ, որ կառավարությունը նման կարևոր հատվածում առևտրի կենտրոն կառուցելու նպատակով ծառերը կտրելով՝ մեծ սխալ է թույլ տալիս: Ես ուզում եմ, որպեսզի իշխանություններն ավելի մեղմ գործեն և արդյունքի հասնեն: Բոլորիս խնդիրն է փրկել Թաքսիմի հրապարակը: Մենք դրա վերաբերյալ պետք է համատեղ որոշում կայացնենք»,- հավելել է նա:
