Մի քանի շաբաթ առաջ հայաստանյան մամուլում տեղեկություն տարածվեց, որ Հայաստան է ժամանելու աշխարհահռչակ երգչուհի Մոնսերատ Կաբալյեն, որին պետք է նվագակցեր Հայաստանի պետական երիտասարդական նվագախումբը:
Հիշեցնենք, որ նվագախումբը մեծ հաջողությամբ ելույթ ունեցավ, վերջերս Երևան ժամանած Մեծ Բրիտանիայի արքայազն Չարլզի պատվին տրված գալա համերգի ժամանակ: Համերգին հետևած ընդունելության ընթացքում արքայազնը չի թաքցրել իր գոհունակությունը և անգամ զարմացել է, որ Հայաստանն ունի երիտասարդներից կազմված այսպիսի պրոֆեսիոնալ նվագախումբ։ Ի դեպ, ինքը՝ Չարլզը, երաժշտության մեծ գիտակ է։ Նա Լոնդոնի սիմֆոնիկ նվագախմբի և Լոնդոնի Philharmonia Orchestra-ի պատվավոր նախագահն է։
Եվ ահա, օրերս պարզվեց, որ համաշխարհային օպերայի լավագույն ներկայացուցիչներից մեկին՝ հանրահայտ երգչուհի Մոնսերատ Կաբալյեին Երևանում կնվագակցի ոչ թե նախօրոք հայտարարված երիտասարդական նվագախումբը, այլ Հայաստանի ֆիլհարմոնիկ նվագախումբը, որի գեղարվեստական ղեկավարը՝ Էդվարդ Թոփչյանը, առայժմ անհայտ «հովանավորի» օգնությամբ կարողացել է շրջանցել Մոնսերատին:
Ի դեպ, նույն համերգի ընթացքում պետք է ելույթ ունենար նաև հայկական երգարվեստի առաջատար Գևորգ Հակոբյանը, սակայն դիրիժորական «կախարդական փայտիկով» նա ևս դուրս է մնացել այս համերգից:
Այն, որ հայերը իրար գցում են նաև մշակութային ոլորտում՝ արդեն նորություն չէ: Հարցը միայն այն է, թե ո՞վ է հովանավորել հերթական «քցոցին»: Գուցե այն նույն մարդի՞կ, ովքեր լոբբինգ էին անում ռաբիս երգիչների համերգները Հանրապետության հրապարակում:
