Կառավարության շենքի դիմաց այսօր բողոքի ակցիա էին անցկացնում «Կիլիկա» նորաբաց առևտրի կենտրոնի շուրջ 120 խանութների վարձակալները:
Կենտրոնը գործել է ընդամենը 10 օր: Վարձակալների խոսքով՝ ոստիկանները պլոմբել իրենց ապրանքները և հորդորել հեռանալ տարածքից՝ առանց որևէ բացատրության. «Հունիսի 1-ն էր՝ Երեխաների պաշտպանության միջազգային օրը, մենք էլ ամենքս մեր ծանոթների, բարեկամների երեխաներին հրավիրել էինք մեզ մոտ, ծաղրածուներ, մուլտֆիլմերի հերոսներ հրավիրել՝ օրը նշելու համար, սակայն երեխաները զվարճանալու փոխարեն՝ զինված մարդիկ տեսան»,- «Առաջին լրատվական»-ին հայտնեց վարձակալներից մեկը:
Նրանք նաև ասացին, որ ունեն անհրաժեշտ բոլոր փաստաթղթերը, հարկայինի հետ որևէ խնդիր չունեն և բացարձակ չեն հասկանում, թե ինչն է պատճառը, որ իրենց թույլ չեն տալիս շարունակել իրենց աշխատանքը. «Մեզ ասում են՝ սնանկ են ճանաչվել, չենք հասկանում՝ ով է սնանկ ճանաչվել, ինչ է եղել: Անձամբ ես 8000 դոլար եմ ծախսել, ապրանք բերել, որպեսզի աշխատեմ, արդեն քանի օր է՝ մեզ ոչ ոք նորմալ պատասխան չի տալիս, և մենք չենք հասկանում՝ որն է խնդիրը»,- ասաց տիկին Սվետան:
Մեր հարցին՝ խոսե՞լ են առևտրի կենտրոնի սեփականատերերի հետ, ի՞նչ են կարծում՝ ինչի հետ կարող է սա կապված լինել, պատասխանեց. «Իհարկե, խոսել ենք, ես չգիտեմ՝ առևտրի կենտրոնը կոնկրետ ումն է, բայց, ըստ երևույթին, ուզում են իրար ձեռքից խլել, և արդյունքում մենք ենք տուժում: Ինչպե՞ս կարելի է այսպես վարվել, դե, իսկ ղեկավարությունը նույնիսկ անտեղյակ է, մեզ հետ այսօր այստեղ են և ոչինչ չեն հասկանում»:
Նշենք, որ բողոքողների մոտ, ինչպես միշտ, գործուղել էին քաղաքացիների ընդունելության և դիմումների քննարկման վարչության պետ Ալեքսանդր Ղազարյանին:
