Ճապոնիայի Հիրոսիմա քաղաքի ղեկավար Կաձումի Մացուին հայտարարել է, որ կդադարի ներողություն սպասել ԱՄՆ-ից ռմբակոծությունների համար, եթե ԱՄՆ նախագահ Բարաք Օբաման այցելի քաղաք: Reuters-ի ճապոնական տարբերակի հաղորդմամբ՝ այս մասին նա հայտնել է լրագրողներին ապրիլի 21-ի մամլո ասուլիսի ժամանակ:
«Իհարկե, մենք կցանկանայինք բարձրացնել (կատարվածի համար) պատասխանատվության հարցը, բայց այդ դեպքերը տեղի են ունեցել 70 տարի առաջ, և հաջորդ սերունդները պետք է հաղթահարեն այդ խնդիրը»,- նշել է Մացուին:
Քաղաքապետը հավելել է, որ այցի դեպքում Օբամայից ակնկալում է այցելություններ ոչ միայն հուշարձաններ և թանգարաններ, այլև հանդիպում ատոմային ռմբակոծությունը վերապրած տեղի բնակիչների հետ:
Այս տարվա մարտին ճապոնական մի շարք ԶԼՄ-ներ հայտնեցին, որ հնարավոր է՝ ԱՄՆ նախագահը Հիրոսիմա այցելի G7-ի գագաթնաժողովի անցկացման ժամանակ, որը տեղի կունենա Ճապոնիայում մայիսի 26-27-ին: «Սպիտակ տունը քննարկում է այդ հնարավորությունը»,- ասել է ԱՄՆ պետքարտուղարի զենքերի և միջազգային անվտանգության վերահսկողության հարցերով տեղակալ Ռոուզ Գետեմյուլլերը:
