Գերմանիայում իրավապահները ձերբակալել են 5 ենթադրյալ նեոնացիստի, որոնք կասկածվում են փախստականների ճամբարների վրա հարձակման համար: Այս մասին հայտնում է Spiegel Online-ը:
Հատուկ գործողությունն իրականացվել է Ֆրայթալ քաղաքում երեքշաբթի առավոտյան: Հաղորդվում է, որ ներգրավված է եղել դաշնային ոստիկանության GSG 9 էլիտար հակաահաբեկչական ստորաբաժանումը:
Բնակարաններում և մի քանի տներում խուզարկություններ են իրականացվել, 5 կասկածյալին վերագրվում է աջ ծայրահեղական «Ֆրայթալ խումբ» խմբավորման ստեղծում, նրանք նաև մեղադրվում են ծանր մարմնական վնասվածքներ հասցնելու և սպանության փորձի համար: Պարբերականի տեղեկությամբ՝ ամենաերիտասրադ ձերբակալվածը 18 տարեկան է, ամենամեծը՝ 39, կասկածյալների մեջ մեկ 27-ամյա կին կա: Կազմակերպության ղեկավարման մեջ 2 կասկածվող արդեն նախնական կալանքի տակ են: Հաղորդվում է, որ խուզարկության արդյունքում հայտնաբերվել են պայթուցիկներ: Ներկայումս հետաքննությամբ գլխավոր դատախազությունն է զբաղվում:
Գերմանիայի գլխավոր դատախազությունը հաստատել է փախստականների ճամբարների վրա հարձակման կասկածյալների ձերբակալությունը:
