Հայաստանում բանկային համակարգն ու կապի ոլորտը շատ զարգացած են և պատրաստ են արագորեն ինտեգրվելու Եվրոպայի տնտեսությանը: Այս մասին այսօր լրագրողների հետ հանդիպման ժամանակ ասաց Տնտեսական համագործակցության եվրոպական լիգայի (ՏՀԵԼ) հայաստանյան կառույցի նախագահ Րաֆֆի Սեմիրջյանը: Նրա խոսքով` մոտ մեկ տարի առաջ Հայաստանում հիմնված ՏՀԵԼ-ի գրասենյակը ուսումնասիրություններ է կատարել այդ երկու ոլորտներում, առաջիկայում կուսումնասիրվեն տնտեսության այլ ոլորտները ևս: «Օրինակ՝ կապի ոլորտում գներն ու առաջարկվող ծառայությունները Հայաստանում շատ ավելի էժան են, քան տարածաշրջանի շատ այլ երկրներում»,- հայտարարեց Րաֆֆի Սեմիրջյանը:
ՏՀԵԼ-ում ներկայացված են ԵՄ երկրների հիմնականում մասնավոր հատվածը` գործարարները, ինչպես նաև ակադեմիական հատվածը` տնտեսագետները: ՏՀԵԼ-ի եվրոպական կառույցի ղեկավար Բեռնարդ Սնոյի խոսքով` գործելով նաև Հայաստանում՝ ՏՀԵԼ-ը նպատակ ունի աջակցել ԵՄ-Հայաստան արևելյան գործընկերությանը` ներկայացնելով հատկապես գործարար հատվածի վերաբերմունքն ու առաջարկները: Ի դեպ, ԵՄ ոչ անդամ երկրներից ՏՀԵԼ-ը գործում է միայն Հայաստանում ու Շվեյցարիայում:
«Դեռևս 2007-ից մեկնարկած եվրոպական հարևանության քաղաքականության նպատակն էր, որպես արդեն 2005-ին մեծացած ԵՄ-ի հարևաններ, տեսնել բարեկեցիկ ու բարգավաճ երկրներ, ովքեր ի վիճակի են մրցակցել Եվրամիության հետ: Տեսնելով այդ քաղաքականության հաջողությունները` ավելի ամբիցիոզ քայլեր արվեցին, և 2009-ից մեկնարկեց Արևելյան գործընկերությունը: Այն գործում է «ավելին ավելիի դիմաց» սկզբունքով, այսինքն` որքան արագ է ինտեգրվում Հայաստանն ու բարեփոխումներ անում, այնքան շատ է Եվրամիությունից օժանդակություն ստանում»,- ասաց Բեռնարդ Սնոյը, ով, ի դեպ, նախկինում զբաղեցրել է Համաշխարհային բանկի գործադիր տնօրենի պաշտոնը:
