Եթե խորհրդային իշխանությունը չսկսեր փոխել ցարական Ռուսաստանի տարածքային բաժանումը, Ղարաբաղում հակամարտություն չէր լինի՝ հայտնում է haqqin.az-ը: Հայերի և ադրբեջանցիների թշնամությունը անողոք է, և այն կապված է նաև Թուրքիայում կոտորածի հետ: Այս մասին հայտարարել է Ռուսաստանի Լիբերալ-դեմոկրատական կուսակցության առաջնորդ Վլադիմիր Ժիրինովսկին:
«Այդպիսի հակամարտությունը չի կարող երկկողմ հիմքով լուծվել: Այդ հակամարտությունը չի լուծի ո՛չ Մինսկի խումբը, ո՛չ ֆրանսիացիները և նույնիսկ ո՛չ ամերիկացիները: Այդ հարցով վերջնական որոշում կարող է ընդունել միայն Ռուսաստանի նախագահը»,- ասել է նա:
Ժիրինովսկու խոսքով՝ Ռուսաստանը միշտ այդ տարածաշրջանում կռվել է պարսիկների և թուրքերի դեմ, նաև պաշտպանել է հայերին:
«Եվ Ադրբեջանը մենք չենք գնել, այն մեզ փոխանցել է Իրանի շահը՝ որպես փոխհատուցում ռուս դեսպանի սպանության: Մենք չենք գրավել Ադրբեջանը»,- ասել է նա:
Ժիրինովսկին Հայաստանին և Ադրբեջանին խորհուրդ է տվել վերադառնալ Ռուսաստանի կազմ, հակառակ դեպքում «նրանք կկռվեն ևս հազար տարի»:
«Մենք պետք է աջակցենք Քրդստանի ստեղծմանը և վերադարձնենք Արևմտյան Հայաստանի հայկական հողերը, և այդ ժամանակ ավտոմատ կերպով կլուծվի Ղարաբաղի հետ կապված հարցը: Դա 21-րդ դարի կեսի խնդիրն է»,- ասել է նա:
