Ադրբեջանում նոյեմբերի 7-ին անցկացված խորհրդարանական ընտրություններում տեղի ունեցած համատարած կեղծիքները ցույց տվեցին, որ իշխանությունը հերթական անգամ անտեսեց միջազգային կառույցների և հասարակայնության կարծիքը: Այս մասին «Ազադլիգ»-ի հետ զրույցում անդրադառնալով նոյեմբերի 7-ին կայացած ընտրություններին` նշել է քաղաքագետ Զարդուշտ Ալիզադեն:
Նրա խոսքերով, թեև ընտրություններից առաջ աշխարհի առաջատար կազմակերպություններն ու կառույցներն Ադրբեջանի իշխանության առաջ ընտրությունները ժողովրդավարական չափանիշներին համահունչ անցկացնելու պահանջ էին դրել, այնուամենայնիվ, տեսանք, թե ադրբեջանական իշխանություններն ինչպես պատասխանեցին միջազգային կառույցների այդ պահանջին:
«Դրա վառ օրինակը Էյնուլլա Ֆաթուլլաևին բանտից ազատելու պահանջն էր, որ միջազգային կառույցներին զուգահեռ Ադրբեջանի իշխանության առաջ դրել էր անգամ ԱՄՆ նախագահ Բարաք Օբաման: Իշխանության այդ վարքը խոսում է այն մասին, որ միջազգային կառույցներին արհամարհող իր այդ գործողություններով նա ձեռնոց է նետում աշխարհին:
Նրա կարծիքով, դրանով իշխանությունը ցույց է տալիս, որ երկիրն իրեն է պատկանում: «Ուզում են ցույց տալ, որ Ադրբեջանի տարածքը իրենցն է, և ոչ ոք չպետք է խառնվի իշխանության գործերին: Արևմուտքի ուզածը տալիս են, բայց ասում են, որ Ադրբեջանի ներքին գործերին չխառնվեն: Մենք մեր ժողովրդին ինչպես ուզում ենք, այնպես էլ ղեկավարում ենք»:
Փորձագետը գտնում է, որ այս իշխանությունների անցկացրած բոլոր ընտրությունները հիշողության մեջ են մնացել իրենց կեղծարարությամբ և օրենքների խախտումներով: «Առաջներում իշխանությունը թույլ էր տալիս մի երկու երեք ընդդիմադիրների մուտքը խորհրդարան: Իսկ այժմ խիստ ցուցում է տվել, որ պետք է անցնեն իր կազմած ցուցակով 125 հոգին և կողքից ոչ մեկը: Սուտ են ասում, թե ընտրություններին 50 տոկոս մասնակցություն է եղել: Այս անգամ ես դիտորդ էի և առավոտյան ժամը 8-ից մինչև երեկոյան 7 անց կես ես ընտրատեղամասում եմ եղել: 1233 ընտրողներից ընտրության են եկել 390 հոգի: Նրանցից մոտ 50 հոգին էլ «կարուսել» էին: Ընտրողների մոտ 30 տոկոսն է մասնակցել ընտրություններին: Մարդիկ ընտրության չեն եկել, որովհետև հավատ չունեն: Իշխանության այս քայլն ուղղված է ընդդիմությանն սպանելուն: Եթե ընդդիմությունն այս անգամ էլ դասեր չքաղի և չփոխի գործելու իր մեթոդը, որոշ ժամանակ հետո ամբողջությամբ կկորի»,- կարծիք է հայտնել Ալիզադեն:
Քաղաքագետ Էլդար Նամազովն էլ ասել է, որ վերջին ընտրությունները ցույց տվեցին, որ բոլոր տեսակի օրինախախտումներն ու կեղծարարություններն Ադրբեջանի ներկայիս ավտորիտար վարչակարգի «զարգացման» ճանապարհն է. «Պետք է իրատես լինել: Շատ բնագավառներում իրավիճակը գնալով ավելի է վատանալու»,-կանխատեսել է քաղաքագետը:
