Ադրբեջանական Trend լրատվական գործակալությանը տված հարցազրույցի ժամանակ Հարավային Կովկասում ԵՄ հատուկ ներկայացուցիչ Հերբերտ Զալբերը Բաքվում հայտարարել է, որ Ղարաբաղյան հակամարտության գոտում ստատուս քվոն անկայուն է, և անհրաժեշտ է գտնել հակամարտության քաղաքական կարգավորումը:
«Շփման գծի վերջին զարգացումները ցույց են տալիս, թե որքան անկայուն է ստատուս քվոն, և որ անհրաժեշտ է գտնել հակամարտության կարգավորումը։ ԵՄ-ն աջակցում է ԵԱՀԿ Մինսկի խմբի ջանքերին ու նրա համանախագահներին՝ կապված հակամարտության կարգավորման հետ»,- ասել է Հերբերտ Զալբերը։
Զալբերը հակամարտող կողմերին կոչ է արել պահպանել հրադադարի ռեժիմը։ Մեկնաբանելով հակամարտության կարգավորման վերաբերյալ Ռուսաստանի առաջարկները՝ Զալբերն ընդգծել է, որ տեղյակ չէ դրանց բովանդակության մասին։
Զալբերը նաև հայտարարել է, որ չի կարծում, թե անհրաժեշտ է փոխել ԵԱՀԿ Մինսկի խմբի ձևաչափը. «Յուրաքանչյուր ձևաչափի փոփոխում պահանջում է ողջ ԵԱՀԿ-ի համաձայնությունը, և ես կասկածում եմ, որ կլինի նման համաձայնություն»։
