Սաուդյան Արաբիան ԱՄՆ նախագահ Բարաք Օբամայի վարչակազմին սպառնում է վաճառել 750 միլիարդ դոլարի արժողությամբ ամերիկյան ակտիվները: Էր-Ռիադը ցանկանում է հասնել այն բանին, որ Օբաման թույլ չտա ԱՄՆ Կոնգրեսում օրինագծին հավանություն տալ, որը ամերիկյան դատարաններում սաուդյան կառավարությանը հնարավորություն կտա դատապարտել 2001 թվականի սեպտեմբերի 11-ի ահաբեկչություններին մասնակից լինելու մեղադրանքով: Այդ մասին ուրբաթ հայտնել է CNN-ը:
Ըստ տեղեկատվության` «Պենտագոնի և պետդեպարտամենտի ներկայացուցիչները» մի քանի գաղտնի հանդիպումներ են անցկացրել ամերիկյան օրենսդիրների հետ` «նրանց զգուշացնելով նմանատիպ օրինագծի տնտեսական և ֆինանսական ծանր հետևանքների մասին»:
Բանն այն է, որ այդ փաստաթղթի հաստատումը թույլ կտա կալանք դնելու ԱՄՆ տարածքում գտնվող Սաուդյան Արաբիայի բանկային հաշիվների և այլ ակտիվների վրա:
Այդ պատճառով էլ իրական սպառնալիքի դեպքում Սաուդյան Արաբիան պարզապես կվաճառի այդ ակտիվները, որոնք պարունակում են ԱՄՆ գանձապետարանի արժեթղթեր:
Այդ մասին Օբամայի վարչակազմին տեղեկացրել է թագավորության ԱԳ նախարար Ադել ալ Ջուբեյրը` անցյալ ամիս Վաշինգտոն այցի ժամանակ:
