Լեռնային Ղարաբաղի հակամարտության սրման հարցն ապրիլի 13-ին քննարկվել է Նիդերլանդների խորհրդարանի արտաքին հարաբերությունների հանձնաժողովի և արտգործնախարար պարոն Կունդերսի հանդիպման ժամանակ։ Հանդիպումը կայացել է ապրիլի 18-ին Եվրամիության արտաքին գործերի նախարարների ժողովի նախապատրաստման կապակցությամբ: Այս մասին հայտնում է Հոլանդահայ կազմակերպությունների ֆեդերացիայից (FAON):
Տարբեր խմբակցությունների պատգամավորներն արտահայտել են իրենց մտահոգությունը, որ հակամարտության լուծման համար ԵԱՀԿ Մինսկի խմբի տարիների բանակցությունները մնացել են առանց արդյունքի: Նրանք նախարարին խնդրել են բացատրել վերջին բռնությունների բռնկման պատճառները, հարևան երկրների, հատկապես Ռուսաստանի և Թուրքիայի դերը, ինչպես նաև իրավիճակը նոր հրադադարի ռեժիմի պայմաններում:
Սոցիալիստական կուսակցության պատգամավոր Հարի վան Բոմելը, նշելով, որ այդ բռնության կրառումը հիմնականում վերագրվում է Ադրբեջանին, ասել է, որ դեռևս գոյություն չունեն անկախ մոնիտորինգի մեխանիզմներ 22 տարվա համաձայնեցված հրադադարի ռեժիմը հսկելու համար։ Անցած տարիներին դա չի նպաստել հակամարտության կարգավորմանը։ Այնուհետև պատգամավորը նախարարին հարցրել է, թե արդյո՞ք նախարարը տեղյակ է, որ ադրբեջանական անօդաչու թռչող սարքերը ռմբակոծել են Ղարաբաղի բնակավայրերը պատճառելով մարդկային զոհեր։
Նախարարը, խոսելով չափազանց մտահոգիչ զարգացման մասին, չի կարողացել հաստատել վերջին լուրը, քանի որ դեռևս գոյություն չունեն անկախ ռազմական վերահսկողություն իրականացնող մեխանիզմներ: ԵԱՀԿ խումբը հետաքննում է այդ հարցերը: Նրա կարծիքով՝ առայժմ չի կարելի ենթադրել, որ հարևան երկրները որոշիչ դեր են խաղացել բռնության բռնկման հարցում, չնայած որ Թուրքիան հստակորեն արտահայտել է իր աջակցությունն Ադրբեջանին, իսկ Ռուսաստանը, թեև դրական դեր է խաղում երկու կողմերին հանդարտեցնելու ուղղությամբ, հայտնի է, որ համակրանք ունի մյուս կողմի նկատմամբ։ Պարոն Կունդերսի կարծիքով՝ հիմնախնդրի լուծման երկարատև բացակայությունը մեծ վրդովմունքի պատճառ է դարձել։
Չնայած պատգամավորները համարում են ԵԱՀԿ Մինսկի խումբը որպես առաջին պատասխանատու մարմին կողմերի հետ բանակցություններում լուծումներ գտնելու համար, այդուհանդերձ որոշակի աջակցող դեր է վերապահված ԵՄ-ի համար այս գործընթացում: Նիդերլանդների ԵՄ նախագահության շրջանակում, պարոն Կունդերսը կնախագահի ԵՄ նախարարների խորհրդի առաջիկա նիստը։ Նրա ուշադրության կենտրոնում կլինի, ըստ խորհրդարանի հանձնարարության, առաջին հերթին համաձայնության հասնելը շփման գծում անկողմնակալ ռազմական դիտարկումներ կատարելու վերաբերյալ:
