Ինչպես այսօր գրում է բրիտանական The Daily Mail-ը, որն ուսումնասիրել է «Ալ-Քաիդայի» առաջնորդ Ուսամա բեն Լադենի ընտանիքի անցած ուղին, այն կարելի է անվանել «գլամուրային կյանքի նմուշ»:
«Թիվ մեկ» ահաբեկչի հայրը` Մուհամադ բեն Լադենը ժամանակին ստեղծել է Saudi BinLadin Group-ը (SBG), և 1980-ականների վերջին Ուսամա բեն Լադենը ժառանգել էր մոտ 250 մլն դոլար, ինչպես նաև գրեթե բոլոր մայրցամաքների վրա գտնվող ընկերություններ, այդ թվում` Gum Arabik Compani Ltd. ընկերությունը, որն արտադրում է աշխարհի կաուչուկի մոտ 80%-ը: Ուսամայի հայրը մահացել է 1967 թ. ավիաաղետից, իսկ ընկերության կառավարիչ է դարձել նրա ավագ որդին` Սալեմը: Հիմա ընդհանուր ընկերությունը ղեկավարում է մյուս եղբայրը` Բաքրը, որը համարվում է Սաուդյան Արաբիայի ամենահայտնի մարդկանցից մեկը:
Բեն Լադենի խորթ եղբայրը` Յիսլամ բեն Լադենը Շվեյցարիայում զբաղվում է բիզնեսով: Բրիտանացի լրագրողները հայտնաբերել էին նկարներ, որտեղ նա գովազդում է իր արտադրած ժամացույցները: Բեն Լադենների ընտանիքը տարբեր ընկերությունների միջոցով մասնաբաժիններ ունի այնպիսի ընկերություններում, ինչպիսիք են Microsft-ն ու Boeing-ը:
Ուսամա բեն Լադենի անվան հետ կապված հաճախ մամուլում հայտնվել է Վաֆա Դյուֆուր անունը: Սա ահաբեկչի եղբոր դուստրն է, որը ծնվել է ԱՄՆ Սանտա Մոնիկա քաղաքում: Նշվում է, որ նա կապեր չի պահել Ուսամայի հետ: 2006թ. Դյուֆուրը նկարահանվել է GQ տղամարդկանց ամսագրի շապիկի համար, իսկ նրան նվիրված հոդվածը անվանվել է «Հեշտ չէ լինել սեքսուալ Բեն Լադեն»: Հետաքրքիր է, որ 2001 թ. սեպտեմբերի 11-ին Դյուֆուրը գտնվում էր Նյու Յորքում:
Նյութերն ըստ RBC-ի:
