«Անկեղծ ասած, ես չեմ էլ նկատել՝ ԵԱՀԿ Մինսկի խմբի համանախագահները եկել են, գնացե՞լ են, որովհետև ես որևէ ակնկալիք էլ չունեի նրանցից, և սպասելի էր, որ իրենք անելու են հերթական անդեմ հայտարարությունը»,- «Առաջին լրատվական»-ի հետ զրույցում ասաց ԲՀԿ խմբակցության ղեկավար Նաիրա Զոհրաբյանը՝ գնահատելով Մինսկ խմբի համանախագահների այցը Հայաստան:
Նաիրա Զոհրաբյանը անընդունելի է համարում ցանկացած արդարացում, երբ Մինսկի խումբը նախահարձակ երկրին՝ Ադրբեջանին, և Հայաստանին անդեմ հայտարարություններ է ուղղում. «Մեր դիակների խոշտանգումները Ադրբեջանի կողմից տիպիկ «Իսլամական պետության» ձեռագիր են»: Նա նշեց, որ այդ փաստացի նյութերն ուղարկվել են ԵԽԽՎ բոլոր քաղաքական ուժերի խմբերին, և դրանք բավարար են՝ «Ադրբեջանը ճանաչելու ռազմական հանցագործ, ահաբեկչական պետություն»՝ հավելելով, որ այդ ամենի մեղավորը միջազգային հանրության հանցավոր լռությունն է:
Անդրադառնալով Սերժ Սարգսյան-Լևոն Տեր-Պետրոսյան հանդիպմանը՝ Նաիրա Զոհրաբյանն ասաց. «Կարծես թե 3 օրում մեր կյանքը փոխվեց: Եվ մեր քաղաքական օրակարգում մենք պետք է կարողանանք շատ ավելի ճիշտ դասավորել մեր գերակայությունները: Ես ողջունում եմ Սերժ Սարգսյանի և Լևոն Տեր-Պետրոսյանի հանդիպումը»:
Նրա խոսքով՝ իհարկե, վերանայման կարիք ունեցող խնդիրները շատ են, և Արցախի խորհրդարանի հետ պետք է հրավիրել մի քանի փակ նիստեր՝ լրջագույն խնդիրները և բացթողումները քննարկելու համար. «Մենք բոլորս մեղավոր ենք, որ սահմանին զոհվում է հայ զինվորը»:
«Ես ամենավերջին անբարոյականությունն եմ համարում, որ գնում են և դիրքերում սելֆիներ են անում ու իրենց նկարները գցում Ֆեյսբուք: Կատեգորիկ պիտի այդ ողջ ոհմակը արագ հետ ուղարկվի Երևան: Ես չգիտեմ՝ աստղեր են, ինչ են: Եթե գնացել եք ինչ-որ բանով օգնելու, օգնեք լուռ՝ առանց ձեր սելֆիները տեղադրելու: Սա առաջին հերթին անհարգալից վերաբերմունք է զոհված զինվորի ծնողի հանդեպ»,- ընդգծեց Նաիրա Զոհրաբյանը: