«Դատախազությունը դեռ որևէ դիմում չի ստացել վարչապետից»,- «Առաջին լրատվական»-ի հարցին՝ վարչապետ Տիգրան Սարգսյանը դիմե՞լ է դատախազություն` Կիպրոսի օֆշորային գոտում իր անվամբ գրանցված սեփականության հետ կապված հանգամանքները պարզելու համար, պատասխանեց գլխավոր դատախազի մամլո խոսնակ Սոնա Տռուզյանը:
Տիգրան Սարգսյանի մամլո խոսնակ Հարություն Բերբերյանը մեզ հետ զրույցում հայտարարել էր, որ «ներկայացված փաստաթուղթը կեղծիք է, ինչի կապակցությամբ վարչապետ Տիգրան Սարգսյանը պատրաստվում է դիմել դատախազություն, որ դրան իրավական գնահատական տան, և մեղավորները պատժվեն»։
Նշենք, որ «Հետք»-ում տպագրվել է Կիպրոսի պետռեգիստրի փաստաթուղթ, համաձայն որի՝ Կիպրոսում գրանցված WLISPERA HOLDINGS LIMITED օֆշորային ընկերության բաժնետերերն են ՀՀ վարչապետ Տիգրան Սարգսյանը, Արարատյան հայրապետական թեմի առաջնորդ Նավասարդ արքեպիսկոպոս Կճոյանը և ադամանդագործ Աշոտ Սուքիասյանը: Իսկ գործարար Փայլակ Հայրապետյանը պնդում է, որ այդ ընկերությունն առնչություն ունի իր ունեզրկման հետ:
«Հետք»-ում հրապարակված ու մամուլով տարածված հոդվածից հետո վարչապետի մամլո խոսնակ Հարություն Բերբերյանը հայտարարել էր. «Հույս ունենք, որ իրավապահ մարմինները կբացահայտեն այն կեղծարարին, ով որ վարչապետի անվան տակ կազմակերպություն է գրանցել կամ գրանցել է, թե չի գրանցել, և հանրությունը կիմանա ճշմարտությունը»,- ասել էր վարչապետի մամլո խոսնակը՝ պատասխանելով «Առաջին լրատվական»-ի այն հարցին, թե պատրաստվո՞ւմ է վարչապետ Տիգրան Սարգսյանը դիմել Կիպրոսի իշխանություններին` Կիպրոսի օֆշորային գոտում վարչապետի սեփականության հետ կապված «դավադրության» հեղինակներին պարզելու համար: