Վրացական Apsny.ge կայքի փոխանցմամբ, Վրաստանի Լեյբորիստական կուսակցությունը Ադրբեջանում ԱՄՆ դեսպան Մեթյու Բրայզային մեղադրել է Կովկասում իրավիճակը պայթեցնելու համար` նրան որակելով որպես «արկածախնդիր դեսպան»:
Կուսակցության գլխավոր քարտուղար Սոսո Շատբերաշվիլին հայտարարել է. «Ոչ վաղ անցյալում ադրբեջանական մամուլը տեղեկատվություն տարածեց, որ Մեթյու Բրայզան Թբիլիսիում հանդիպում է ունեցել Վրաստանի նախագահ Միխեիլ Սաակաշվիլիի և Ազգային անվտանգության խորհրդի (ԱԱԽ) քարտուղար Գիգա Բոկերիայի հետ: Այդ հանդիպման ընթացքում կողմերը քննարկել են Ադրբեջանի նախագահ Իլհամ Ալիևի գահընկեցության հարցը:
Մեր կուսակցությունը վերլուծության է ենթարկել լրատվամիջոցներում հրապարակված նյութերը և եկել այն եզրահանգման, որ Սաակաշվիլի-Բոկերիա զույգը և նրանց նեոպահպանողական մաքքեյնական գործընկերներն իրավիճակի սրման համար վիթխարի վտանգ են ներկայացնում:
Իրավիճակն առավել բարդեցնում է այն, որ Բաքվում ԱՄՆ դեսպանը կլինի Սաակաշվիլիի հովանավոր և հեղափոխությունների մասնագետ Մեթյու Բրայզան, որը մեկ անգամ չէ, որ սրել է իրավիճակը Կովկասում:
Ելնելով այս դիտարկումներից` մենք ԱՄՆ սենատին խնդրում ենք Բրայզային չհաստատել Ադրբեջանում ԱՄՆ դեսպանի պաշտոնում: Մենք նաև դիմում ենք Ադրբեջանի նախագահ Իլհամ Ալիևին, որպեսզի նա իր համաձայնությունը չտա Բրայզայի նշանակմանը:
Հիշեցնենք, որ դեկտեմբերի 30-ին ԱՄՆ նախագահ Բարաք Օբաման, օգտվելով նրանից, որ Կոնգրեսը գտնվում է արձակուրդում, Բրայզային նշանակեց Ադրբեջանում ԱՄՆ դեսպանի պաշտոնում: Ի դեպ, Օբաման նրան Ադրբեջանում ԱՄՆ դեսպանի պաշտոնում նշանակել էր դեռևս 2010 թվականի մայիսին:
Ապա դա հաստատել էր Սենատի Արտաքին հարաբերությունների հանձնաժողովը, սակայն հայամետ սենատոր Բարբարա Բոքսերի (որը դարձյալ վերընտրվել է Սենատում) ջանքերով Բրայզայի թեկնածությունը քվեարկության չդրվեց Սենատի լիագումար նիստում և հանվեց օրակարգից: Այժմ Բրայզան, ինչպես նաև Թուրքիայում ԱՄՆ դեսպան Ֆրենսիս Ռիկիարդոնեն, սպասում են Սենատում իրենց թեկնածության վավերացմանը: