Բանակում խաղաղ պայմաններում զոհված զինծառայողների մի մասի գործերի քննությունը 2015 թվականի տարեվերջին կասեցվել է, և հայտնի չէ, թե ինչ ճակատագիր կունենան դրանք։ Ընդ որում՝ զոհված զինծառայողների մայրերից շատերին անգամ պատշաճ կարգով չեն տեղեկացրել գործի կասեցման մասին։ Նրանք այդ մասին իմացել են տարեվերջին ԱԺ-ում պետաիրավական հանձնաժողովի նախագահ Հովհաննես Սահակյանի հետ հանդիպման ժամանակ։
Իրավապաշտպան Ավետիք Իշխանյանը գործերի կասեցման և չբացահայտման մեջ միտում է տեսնում։ «Ես կարծում եմ, որ մեր իրավապահները այդքան ոչ պրոֆեսիոնալ չեն, որ չկարողանան բացահայտել փակ համակարգում կատարված գոնե մեկ սպանություն։ Դա նշանակում է, որ հստուկ միտում կա սպանությունները չբացահայտելու մեջ, որովհետև բացահայտման պարագայում կպարզվի, որ դրանց հետևում կանգնած են Սերժ Սարգսյանին և իշխանություններին տարբեր ծառայություն մատուցող անձիք»,- ասաց Իշխանյանը։
Ասուլիսին մասնակից՝ զոհված Վալերիկ Մուրադյանի մայրը՝ Նանա Մուրադյանը, հավելեց, որ իր որդին «Հայկազով» զորամասում ծառայության ժամանակ ականատես էր եղել վառելանյութի գողության, անգամ այդ մասին հեռախոսով պատմել էր իրեն, դրա համար էլ այդ զանգից 4 օր անց նրան իբր կախված գտան։ «Էն դեպքւոմ, երբ որդուս դիակի վրա բազմաթիվ հետքեր կային, և մենք մինչև էսօր պահանջում ենք ու ոչ մի պատշաճ պատասխան չենք ստացել մեր հարցերին՝ որտեղից նրա վրա առաջացան այդ հետքերը: Պարանոցի վրա երկու պարանի հետք կար, որը նշում է նաև դատաբժիշկը իր փորձաքննության եզրակացության մեջ: Բացի դրանից՝ նշում է նաև, որ կա կարմիր գույնի ժապավենաձև արյունազեղում: Բայց մինչև հիմա մենք այդպես էլ չիմացանք՝ այդ արյունազեղումը ինչի՞ հետևանք էր՝ պարանի՞, թե՞ այլ բանի։ Փորձաքննության ժամանակ նաև գործից անհետացել էին տղայիս սապոգները, էն դեպքում, երբ դրանք պետք է գործում լինեին, և փորձաքննությամբ ապացուցվեր, որ կախվելու համար աթոռին կանգնած է եղել հենց իմ տղան, և նրա սապոգների հետքերը պետք է աթոռին լինեին, բայց ոչ մի բան չունենք»,- ասաց տիկին Մուրադյանը։
Արթուր Ղազարյանի մայրը դժվարանում էր խոսել որդու մահվան հանգամանքների մասին։ Նրա խոսքով՝ իր որդուն զորամասից արդեն մահացած վիճակում են տեղափոխել Մուրացանի հոսպիտալ և իրենց ներկայացրել են, թե տղայի գլխին ուռուցք կա, և պետք է ուռուցքը վիրահատեն, էն դեպքում, երբ Արթուրն արդեն իսկ մահացած է եղել։ Մոր խոսքով՝ երբ քահանա են կանչել, որ կնքի իրենց որդուն, և քահանան փորձել է նշխարը դնել տղայի բերանում, չի կարողացել, քանի որ բերանը սոսնձված է եղել։
Զոհված զինծառայողների մայրերը համոզված են, որ իրենց որդիների գործերը կբացահայտվեն միայն իշխանափոխության պարագայում։
Լուսանկարը՝ PanARMENIAN Photo-ի
