Սերժ Սարգսյանը մարտի 10-ի մեկնելու է Մոսկվա, որտեղ ՌԴ նախագահ Պուտինի հետ քննարկելու է հայ-ռուսական հարաբերություններին վերաբերող օրակարգային հարցեր: Այս մասին ռուսական «Կոմերսանտ» պարբերականի հետ հարցազրույցում հայտնել է Հայաստանի արտաքին գործերի նախարար Էդվարդ Նալբանդյանը:
Նալբանդյանի հարցազրույցը նախորդել է Սերժ Սարգսյանի այցին: Իսկ դրան նախորդել էր Եվրամիության արտաքին հարաբերությունների և անվտանգության հարցերով հանձնակատար Ֆեդերիկա Մոգերինիի այցը Հայաստան, ընդ որում՝ Ադրբեջան և Հայաստան: Եվ եթե նկատի առնենք նաև այն, որ նախորդ շաբաթ էլ տեղի էր ունեցել Պուտին-Ալիև ամբողջ երկու հեռախոսազրույց, մեկ-երկու օր ինտերվալով, ապա ակնհայտ է դառնում, որ Սերժ Սարգսյանի մոսկովյան այցը ըստ էության տեղավորվելու է հենց այս տարածաշրջանային աշխարհաքաղաքական զարգացումների օրակարգում, և միայն այդ համատեքստում է շոշափվելու հայ-ռուսական հարաբերությունների խնդիրը:
Միևնույն ժամանակ շատ հետաքրքրական է և այն, որ Սարգսյանը Մոսկվա է մեկնում ներիշխանական բավական լուրջ վերադասավորումներ իրականացնելուց հետո: Դժվար է ասել՝ այդ վերադասավորումներն ավարտված են, թե շարունակվելու են նաև առաջիկայում: Իսկ գուցե ավարտված է դրանց առաջին փուլը, և Սերժ Սարգսյանը Մոսկվայում կա՛մ կներկայացնի դրանց էությունը Պուտինին, կամ էլ կստանա, այսպես ասած, կատարողականի գնահատական: Բոլոր դեպքերում, կարծեք թե բավականին նկատելի է, որ մոսկովյան այցի ընթացքում Սերժ Սարգսյանը ՌԴ նախագահին պետք է հավաստիացնի, որ և՛ արտաքին հարթության վրա, և՛ ներքին հարթությունում իր քայլերը կասկածի տակ չեն դնում Ռուսաստանի շահերը:
Ներքին առումով խոսքը, իհարկե, ներիշխանական վերադասավորումների մասին է, իսկ արտաքին հարթությունում խոսքը Եվրամիության հետ նոր բանակցությունների մասին է: Իհարկե, մյուս առանցքային խնդիրը տնտեսական իրավիճակն է, որը Հայաստանի դեպքում գործնականում մոտ է աղետալիին, և Սերժ Սարգսյանը Մոսկվայում ըստ ամենայնի կա՛մ խնդրելու է Ռուսաստանից որոշակի տնտեսական օժանդակություն, այդ թվում՝ գուցե փորձելով լուծել գազի գնի նվազեցման խնդիրը, որը Երևանը հայ-ռուսական օրակարգ բերեց Հովիկ Աբրահամյանի նամակով՝ ուղղված Մեդվեդևին, կա՛մ Մոսկվայից թույլտվություն է խնդրելու այլ երկրների հետ տնտեսական կապերը խորացնող որևէ նախագծի կամ նախագծերի վերաբերյալ, հատկապես նկատի ունենալով այն, որ Սերժ Սարգսյանը հայտարարել է արտաքին գործընկերների հետ տնտեսական հարաբերությունները խորացնելու վերաբերյալ խորհրդակցությունների շարք նախաձեռնելու մասին և արդեն իսկ անցկացրել երեք խորհրդակցություն՝ Իրան, Ավստրիա և Ֆրանսիա ուղղությունների վերաբերյալ:
Այս ամենով հանդերձ՝ հայ-ռուսական հարաբերություններում որևէ նմանօրինակ ընդգրկուն հարցերի մասով առանցքային հարցը ոչ այնքան այն է, թե ինչ ձեռք կբերի Հայաստանը, որքան այն, թե ինչ գնով ձեռք կբերվի որևէ շահեկան համաձայնություն:
