Ուժգին ջրհեղեղի սպառնալիքի պատճառով Նորվեգիայի հարավային շրջաններում բնակիչների տարհանում է սկսվել: Այս մասին հայտնում է ITAR-TASS-ը:
Կվամ կոմունայում գետում ջրի մակարդակը, ականատեսների վկայություններով, յուրաքանչյուր 10 րոպեում բարձրացել է կես մետրով: Էյդսվոլ կոմունայում Հոլտե քաղաքում արտակարգ տարհանման պատճառ է դարձել ամբարտակի փլուզման սպառնալիքը: Ոստիկանությունում հայտարարել են, որ եթե նման բան տեղի ունենա, ջուրը կտանի ճանապարհին հանդիպած ամեն ինչ:
Տեղատարափ անձրևներն ու ձյան շարունակվող հալոցքը Նորվեգիայի արևելքում (Էստլանդե) ծայրահեղ վիճակ են ստեղծել: Օդերևութաբանների կանխատեսումներով՝ տեղումնրի շարունակականությունը կարող է հանգեցնել վերջին կես դարում ամենաուժգին ջրհեղեղին:
Ներկայում տարածաշրջանում բազմաթիվ ավտոմոբիլային ճանապարհներ հեղեղված են, Օսլոն և Տրոնհեյմն իրար միացնող ավտոմայրուղու վրա ասֆալտ է փլուզվել, ձևավորվել է մի քանի մետր խորությամբ հոր: Միանգամից մի քանի ուղղություններով կաթվածահար է եղել երկաթուղային հաղորդակցությունը:
Մի շարք բնակավայրերում ջուրը լցվել է նկուղները: Տեղացիները մտավախություն ունեն, որ աղետը կարող է խանգարել գյուղատնտեսական աշխատանքների իրականացմանը:
Նմանօրինակ իրավիճակ է դիտվում նաև հարավային, կենտրոնական և այլ շրջաններում: Երկրի Արդարադատության և հասարակական անվտանգության նախարարությունն արդեն հանձնարարել է քաղաքացիական պաշտպանության ուժերին կապ պահպանել տեղի իշխանությունների հետ՝ ջրհեղեղի հետևանքները համատեղ վերացնելու համար: