Լոնդոնում անցած գիշեր բախումներ են տեղի ունեցել ազգայնականների և ոստիկանության միջև: Այս մասին հայտնում է Sky News-ը:
Ինչպես հաղորդվում է՝ չորեքշաբթի երեկոյան 75-100 մարդ էր հավաքվել Լոնդոնի արևելքում փաբերից մեկի մոտ: Նրանք սկսել էին ազգայնական երգեր երգել, այնուհետև նրանց միացել են «Անգլիայի պաշտպանության լիգա» աջ ծայրահեղական կազմակերպության ակտիվիստները: Ոստիկանության աշխատակիցները փորձել են շրջապատել հավաքվածներին, սակայն ազգայնականները դիմակայություն են ցույց տվել:
Միջադեպի ընթացքում ոստիկանները ստիպված են եղել կիրառել ռետինե մահակներ, իսկ ազգայնականները իրենց հերթին իրավապահների ուղղությամբ շշեր և ճայթուցիչներ են նետել: Այս պահին տուժածների մասին չի հաղորդվում:
Մայիսի 22-ի երեկոյան Մեծ Բրիտանիայում գրանցվել է նաև մզկիթների վրա հարձակման առնվազն երկու դեպք: Էսեքս կոմսությունում ձերբակալվել է մի մարդ, որը դանակով զինված ներխուժել էր մզկիթ և փորձել հրդեհել այն: Քենթ կոմսությունում էլ ոստիկանությունը ձերբակալել է մի տղամարդու, որը փորձել է վնասել Գիլինգեմ քաղաքի մզկիթի շենքը:
Միջադեպերը տեղի են ունեցել մի քանի ժամ անց այն բանից, երբ Լոնդոնի հարավարևելյան Վուլվիչ շրջանում երկու հանցագործներ դանակահարել էին բրիտանական բանակի զինծառայողի: Ականատեսների վկայությամբ՝ հանցագործները բացականչել են՝ «Ալլահ, աքբար»:
Դեպքի վայր ժամանած ոստիկանները փոխհրաձգության մեջ են մտել հանցագործների հետ ու ձերբակալել նրանց: Ներկայում չարագործները վնասվածքներով գտնվում են Լոնդոնի հիվանդանոցներում՝ կալանքի տակ:
Ոստիկանության նախնական գնահատականով՝ կատարվածը քաղաքական ենթատեքստով իսլամիստների ահաբեկչական գործողություն է: