ՀՀ կենտրոնական ընտրական հանձնաժողովը ԱԺ ՀՅԴ խմբակցության նախկին պատգամավոր Արծվիկ Մինասյանի պատգամավորական մանդատը հանձնեց ՀՅԴ համամասնական ցուցակի հաջորդ համարի թեկնածու Կարեն Շահմուրադյանին: Մարտի 2-ին տեղի ունեցավ ՀՀ ԿԸՀ նիստ, որի օրակարգում նախկին պատգամավոր Արծվիկ Մինասյանի պատգամավորական մանդատը ՀՅԴ համամասնական ղուցակի հաջորդ թեկնածուին հանձնելու հարցն էր:
ԿԸՀ նախագահ Տիգրան Մուկուչյանը նիստի մասնակիցներին հայտնել է, որ փետրվարի 25-ին ՀՀ ԱԺ նախագահ Գալուստ Սահակյանի կողմից Կենտրոնական ընտրական հանձնաժողով է ուղարկվել գրություն, որին կից եղել է արձանագրություն ՀՅԴ համամասնական ցուցակով պատգամավոր ընտրված Արծվիկ Մինասյանի պատգամավորական լիազորությունները դադարեցնելու մասին: «Նման դեպքերում՝ համաձայն Հայաստանի Հանրապետության ընտրական օրենսգրքի՝ պատգամավորական մանդատը ստանում է կուսակցության համամասնական ցուցակի հաջորդ թեկնածուն»,- նշել է Մուկուչյանը:
Մուկուչյանը նշել է, որ ՀՅԴ համամասնական ցուցակի անդամներից որևէ մեկն ինքնաբացարկ չի ներկայացրել, ուստի Արծվիկ Մինասյանի պատգամավորական մանդատը փոխանցվում է ցուցակի հաջորդ համարի թեկնածու Կարեն Շահմուրադյանին: Համապատասխան արձանագրությունը ստորագրեցին հանձնաժողովի բոլոր անդամները: Տիգրան Մուկուչյանը հավելեց, որ հաստատված արձանագրության մեկ օրինակ կուղարկվի Ազգային ժողովի նախագահին:
ԱԺ ՀՅԴ խմբակցության նախկին պատգամավոր Արծվիկ Մինասյանը ՀՀ նախագահի հրամանագրով նշանակվել է ՀՀ էկոնոմիկայի նախարարի պաշտոնում:
