Այսօր երեկոյան ՀՀ կառավարության և IBM ընկերության միջև ստորագրվեց փոխըմբռման հուշագիր՝ երկարաժամկետ համատեղ համագործակցության հնարավորություններն ու տարբերակներն ուսումնասիրելու նպատակով:
Հուշագիրը վարչապետ Տիգրան Սարգսյանի ներկայությամբ ստորագրեցին ՀՀ էկոնոմիկայի նախարար Վահրամ Ավանեսյանը և IBM ընկերության փոխնախագահ Կիրիլ Կորնիլևը:
Երկկողմ համագործակցության վերաբերյալ պայմանավորվածությունը ձեռք էր բերվել Տիգրան Սարգսյանի՝ նախորդ տարեվերջին ԱՄՆ կատարած այցի շրջանակներում:
Հուշագրի շրջանակում կողմերը մտադիր են մշակել համաձայնագիր՝ ՀՀ-ում IBM-ի նորարարական լուծումների և տեխնոլոգիաների կենտրոնի ստեղծման ուղղությամբ ( Center for IBM Innovative Solutions and Technologies):
Հուշագրի շնորհիվ կողմերը կուսումնասիրեն IBM-ի կրթական ծրագրերում ՀՀ-ի կրթական հիմնարկների մասնակցության շրջանակը` տեղեկատվական տեխնոլոգիաների, մասնավորապես, կիբեռանվտանգության և էլեկտրոնային առևտրի ոլորտներում գիտելիքներն ընդլայնելու նպատակով: Ըստ էկոնոմիկայի նախարարի` առայժմ նախատեսվում է համագործակցել ԵՊՀ-ի, Հայաստանի ամերիկյան համալսարանի, Եվրոպական տարածաշրջանային ակադեմիայի և Հայաստանի պետական ճարտարագիտական համալսարանի հետ:
«Ինչպես ամբողջ աշխարհում այնպես էլ Հայաստանում, տեղեկատվական տեխնոլոգիաների ոլորտը հանդիսանում է տնտեսության կարևորագույն ճյուղերից մեկը, որն ունի մեծ ազդեցություն նաև այլ ոլորտների արտադրողականության վրա: Համատեղելով IBM-ի և միջազգային լավագույն փորձը տեղական փորձի և տաղանդի հետ, մտադիր ենք հաստատել երկարաժամկետ համագործակցություն, որը նպաստի կայուն տնտեսական աճի և համաշխարհային շուկայում մրցունակության գրավական հանդիսացող տեղական ներուժի կառուցմանը»,- նշեց Կիրիլ Կորնիլևը:
IBM-ի մասնագետների կողմից ՓՄՁ-երի համար կկազմակերպվեն վերապատրաստման ծրագրեր և սեմինարներ, ինչպես նաև կստեղծվի աջակցող միջավայր, որը կապահովի գործարար և տեղեկատվական տեխնոլոգիաների բնագավառի ծառայությունների մատուցումը ՓՄՁ-երին` նպաստելով Հայաստանում ընդհանուր գործարար միջավայրի բարելավմանը:
Տվյալ hուշագիրը պարտադիր ուժ չունի և չի դնում որևէ իրավական պարտավորություններ Հայաստանի կառավարության կամ IBM-ի վրա:
