Այսօր Ազգային ժողովի նախագահ Հովիկ Աբրահամյանը վարչապետ Տիգրան Սարգսյանին հրավիրել էր ԱԺ բուֆետ` ճաշելու: Նրանց հետ էր նաև պաշտպանության նախարար Սեյրան Օհանյանը և ՀՀԿ խմբակցության ղեկավար Գալուստ Սահակյանը:
Սա բավական արտառոց երևույթ է այն առումով, որ Հ. Աբրահամյանը երբեք ԱԺ բուֆետում չի սնվել: Նա օգտվում է իր առանձին խոհանոցից, որտեղ բավականին ճոխ սնվելու հնարավորություն ունի: Իսկ վարչապետի հետ բուֆետ իջնելու հանգամանքը երեկ ԱԺ ում տարբեր կերպ էին մեկնաբանում: Նախ՝ այն, որ նա ցանկանում է հարաբերությունները կարգավորել Տ. Սարգսյանի հետ: Հայտնի է, որ Հ. Աբրահամյանը վարչապետ դառնալու մեծ ցանկություն է ունեցել: Եվ նրա այդ ցանկությունը սուր էր հատկապես նախորդ 5 տարիներին, երբ վարչապետ էր Տ. Սարգսյանը: Հ. Աբրահամյանը նաև հույս է ունեցել, որ գոնե այս անգամ կնշանակվի այդ պաշտոնին: Եվ քանի որ այս անգամ էլ դա չստացվեց, նա հավանաբար փորձում է Տ. Սարգսյանի հետ մեղմել իր բավական լարված հարաբերությունները: Եվ դա անում է ցուցադրաբար՝ ԱԺ բուֆետում, որտեղ ճաշում էին նաև լրագրողներն ու պատգամավորները:
Հ. Աբրահամյանը պատահական չի ընտրել այս օրը. այսօր ԱԺ-ում քննարկվում էր Կառավարության ծրագիրը, որի ժամանակ ներկա էին գրեթե բոլոր նախարարներն ու պատգամավորները, և շատ հարմար պահ էր հանրությանը ցույց տալու իր ու վարչապետի «մտերմությունը»:
Բացի այդ, կարծիք կա, թե ԱԺ նախագահը նաև ցանկացել է հանրությանը ցույց տալ, որ ինքը ոչ թե «ճոխ զավտրիկների» ու սննդի սիրահար է, այլև շատ համեստ պաշտոնյա է ու կարող է սնվել նաև բուֆետում, շարքային աշխատողների հարևանությամբ:
Հայտնի է, որ ԱԺ բուֆետը նոր է վերանորոգվել: Դեռևս անցած քառօրյային երբ այն նոր էր բացվել, հրապարակում եղավ, թե գները շատ բարձր են: Բուֆետը վարձակալել է «Արտլանչ» ընկերությունը, որն էլ, նախորդ գների համեմատ, ավելի քան կրկնակի անգամ բարձր գներ է սահմանել: Դա բավականին մեծ դժգոհություն էր առաջացրել թե՛ ԱԺ աշխատակազմի, թե՛ լրագրողների մոտ: Այդ դժգոհությունից հետո հրապարակում եղավ, թե գները կէժանացնեն: Եվ իսկապես, մի փոքր իջեցրել էին, բայց դրանք նորից բավականին բարձր էին՝ նախորդի համեմատ: ԱԺ աշխատակազմը, նաև լրագրողները կարծես թե բոյկոտում են ու չեն սնվում ԱԺ բուֆետում, որովհետև գներն, իսկապես, բավականին բարձր են: Եվ այսօր ասում էին, որ Հ. Աբրահամյանը վարչապետի հետ այնտեղ ճաշելով՝ մի նպատակ էլ է ունեցել՝ փորձել է բուֆետը գովազդել:
Լուսանկարը՝ Գագիկ Շամշյանի
