Ֆրանսիայի ոստիկանությունը ձերբակալել է 29-ամյա ուսանողուհու, որը Ֆրանսիայի էկոնոմիկայի նախարար Էմանուել Մակրոնին մի քանի ամիս սիրային նամակներ ու էրոտիկ լուսանկարներ է ուղարկել էլեկտրոնային փոստով: Այս մասին հայտնում է Midi Libre թերթը:
Սկզբում Մակրոնն ուշադրություն չի դարձրել հաղորդագրություններին, բայց փետրվարի 16-ին, այնուամենայնիվ, ոստիկանությունում հայտարարություն է տվել:
Նամակների հեղինակի անձն արագ պարզվել է: Նա եղել է երկրի հարավային Ժյուվինյակ կոմունայի բնակչուհի: Նրա տանը խուզարկություն է կատարվել, ոստիկանությունը բռնագրավել է համակարգիչն ու բջջային հեռախոսը:
Հետաքննիչները կարծում են, որ ուսանողուհին վտանգ չի ներկայացնում, բայց քանի որ նա հետապնդել է հանրային անձի, գործն ինչպես հարկն է կհետաքննվի: Աղջիկը պետք է հետազոտություն անցնի հոգեբույժի մոտ:
Էկոնոմիկայի նախարարի ապարատում հրաժարվել են մեկնաբանել ձերբակալության մասին տեղեկությունը:
Midi Libre-ն նաև հայտնում է, որ ըստ օրենքի՝ «կապի էլեկտրոնային միջոցներով ոտնձգության համար» աղջկան սպառնում է մինչև 1 տարվա ազատազրկում և 15.000 եվրո տուգանք:
