Թուրքական Anadolu լրատվական գործակալության փոխանցմամբ՝ Թուրքիայի նախագահի խոսնակ Իբրահիմ Քալընը հայտարարել է, որ Թուրքիայի ազգային անվտանգության հարցը ընդհանրապես բանակցությունների ու սակարկության առարկա չէ։
Նա ընդգծել է, որ Սիրիայից Թուրքիայի նկատմամբ սպառնալիքների հայտնվելու դեպքում Թուրքիան միջազգային օրենքների շրջանակում պատասխան կտա դրանց՝ անկախ նրանից, թե այդ սպառնալիքը բխում է ԴԱԻՇ-ի՞ց, թե՞ YPG-PYD-ից (Սիրիայի քրդերից):
«Մենք պատրաստ ենք մեր դաշնակից ու բարեկամական երկրների հետ բանակցել, խորհրդակցել ամեն թեմայի շուրջ, սակայն Թուրքիայի ազգային անվտանգության հարցը ընդհանրապես բանակցելու ու սակարկելու թեմա չէ»,- ասել է նա։
Խոսելով Սիրիայում փետրվարի 27-ից հրադադարի հաստատման մասին ռուս-ամերիկյան պայմանավորվածության մասին՝ Քալընը հայտարարել է, որ իրենք սկզբունքորեն աջակցում են դրան՝ հավելելով, որ Թուրքիան նույնպես ակտիվ դեր է խաղացել նման որոշման համար։
Քալընն ընդգծել է, որ իրենց, սակայն, մտահոգում է հրադադարի ապագան՝ հաշվի առնելով, որ ռուսական ինքնաթիռները շարունակում են ռմբակոծությունները, իսկ Սիրիայի նախագահ Բաշար Ասադի զորքերը հարձակումը շարունակում են ցամաքից։
Քալընը պահանջել է դադարեցնել այդ ամենը՝ ընդգծելով, որ այդ հարձակումներն էլ ավելի են խորացնում փախստականների շուրջ ծագած ճգնաժամը։
