ԱՄՆ Կոնգրեսի մի շարք անդամներ նամակ են հղել Google ընկերության ղեկավար Լարի Փեյջին, որում պահանջել են բացատրել հավելյալ իրականության ակնոցների կիրառման դեպքում շարքային ամերիկացիների մասնավոր կյանքի անձեռնմխելիության պահպանման բոլոր հնարավորությունները: Այս մասին գրում է Wall Street Journal-ը:
Կոնգրեսականները մասնավորապես մտադիր են իմանալ, թե ինչ է պատրաստվում անել Google-ը մասնավոր կյանք ներխուժումից շարքային ամերիկացիների շահերը պաշտպանելու համար: Օրենսդիրները ցանկացել են նաև պարզել, թե ինչպես կորպորացիան կպաշտպանի և կնախազգուշացնի ոչ օգտատերերին մոտակայքում գործող սարքի առկայության մասին:
Փեյջը պետք է կոնգրեսականների հարցերին պատասխանի հունիսի 14-ից ոչ ուշ:
Կոնգրեսականների ուղերձը Google-ի կենտրոնակայան է ուղարկվել այն բանից հետո, երբ մի շարք ամերիկյան սրճարաններ, կինոթատրոններ և գիշերային ակումբներ արգելել են դրա կիրառումը: Նրանք մտավախություն ունեն, որ դրանց միջոցով որոշ օգտատերեր կարող են լուսանկարել այլ հաճախորդների՝ առանց նրանց գիտության:
