Կառավարության շենքի առջև այս պահին հավաքված են մի խումբ քաղաքացիներ, այդ թվում՝ բանակում խաղաղ պայմաններում զոհված զինվորների հարազատներ: Նրանք բողոքում են օրեր առաջ Նոյեմբերյանի զորամասերից մեկում սպանված Լյուքս Ստեփանյանի դիակը Երևան բերելուն խոչընդոտելու դեմ:
Կառավարության շենքի առջև հավաքված զոհված զինծառայողների ծնողներից Իրինա Ղազարյանը, ում տղան երկու տարի առաջ սպանվել է Արցախում՝ Հադրութի զորամասում, «Առաջին լրատվական»-ի հետ զրույցում նշեց, որ ինքը նույնպես ցանկացել է իր տղայի դին բերել կառավարության շենքի առջև, սակայն իրեն ևս թույլ չեն տվել: Իրինա Ղազարյանը հավելեց, որ իր տղան մեկն էր այն զինվորներից, ում մասին ՀՀԿ-ական պատգամավոր Շուշան Պետրոսյանը Պետրոս Ղազարյանի հաղորդման հյուր լինելու ընթացքում ասել է՝ «Հադրութում սպանված զինվորները…», որից հետո մեծ աղմուկ բարձրացավ, քանի որ այդ սպանությունների մասին տեղեկությունները մինչ այժմ կոծկվում են: Նա նշեց, որ բանակում այս ամենաթողությունների գլխավոր հեղինակը Սեյրան Օհանյանն ու Սերժ Սարգսյանն են. «Մենք զինվոր ենք ուղարկում բանակ, որ ողջ-առողջ հետ ստանանք, ինչո՞ւ են մեր երեխաներին հոշոտում»:
Ավելացնենք, որ Իրինա Ղազարյանին պաշտոնական տեղեկություն են հայտնել, թե տղան մահացել է գլխի ուռուցքից, սակայն ծնողը նշում է, որ մինչ բանակ գնալը իր տղան համապատասխան բուժզննություն է անցել և եղել է լիովին առողջ: Նա նշում է, որ որդու հետ վերջին անգամ խոսել է մահվանից երկու օր առաջ, և տղան ասել է, որ իրենց զորամասի հրամանատարը նարկոբիզնեսի մեջ է խառնված: Դրանից երկու օր անց ծնողին հայտնել են որդու մահվան լուրը:
Այս պահին կառավարության շենքի առջև բողոքի ակցիան շարունակվում է, հավաքվածները պահանջում են զոհված Լյուքս Ստեփանյանի դին բերել Երևան և դադարեցնել բանակում խաղաղ պայմաններում զինվորների սպանությունը:
