Թուրքիան պատրաստ է աջակցել Սիրիայում թռիչքների համար փակ գոտու ստեղծմանը, սակայն կարծում է, որ այդ որոշումը ՄԱԿ-ի Անվտանգության խորհրդի արտոնութունն է: Այս մասին տեղեկացնում են թուրքական ԶԼՄ-ներն ու Reuters գործակալությունը՝ հղում կատարելով Թուրքիայի վարչապետ Թայիփ Էրդողանի հայտարարությանը:
«Այս որոշումն ԱՄՆ-ը և Թուրքիան կայացնել չեն կարող: Այն պետք է ՄԱԿ-ի Անվտանգության խորհուրդը որոշի»,- հայտարարել է վարչապետը՝ ելույթ ունենալով ԱՄՆ-ի Բրուքինգս ինստիտուտում:
Սիրիայի ընդդիմությունը, ինչպես նաև որոշ արևմտյան քաղաքական գործիչներ, կոչ են անում Սիրիայում թռիչքների համար փակ գոտի ստեղծել, որպեսզի սիրիական ռազմաօդային ուժերին խանգարեն երկրի զինված ընդդիմությանն օդային հարվածներ հասցնել:
Ապրիլի վերջին ԱՄՆ պետքարտուղար Ջոն Քերին հայտարարել էր, որ Սիրիայում քիմիական զենքի կիրառման վերաբերյալ տեղեկատվության հաստատման դեպքում ԱՄՆ-ը կարող է Սիրիայում թռիչքների համար փակ գոտի ստեղծել:
