Թուրքական Haberler.com կայքի փոխանցմամբ, վարչապետ Էրդողանը հանդես է եկել Լիբիայի վերաբերյալ հայտարարությամբ.
«Լիբիայում առկա է նոր քաղաքական գործընթաց: Ահրաժեշտ է, որ Քադաֆին անհապաղ հրաժարական տա և Լիբիան թողնի լիբիացիներին: Ոմանք սխալ են հասկացել Լիբիայի հանդեպ մեր դիրքորոշումը, ինչի պատճառով այն որոշ երկրներում շահարկման առարկա է դարձել:
Հանուն սեփական ժողովրդի ապագայի, Քադաֆին պետք է գնա այդ պատմական ու մարդկային քայլին: Լիբիան չի պատկանում մեկ անձի, այն բոլոր լիբիացիներինն է»:
Հիշեցնենք, որ ապրիլի սկզբին Էրդողանը ներկայացրել էր Լիբիայում իրավիճակի կարգավորման շուրջ «ճանապարհային քարտեզ», որը բաղկացած էր 3 կետից.
ա) Գործընթացի խաղաղ կարգավորում` հիմնված Լիբիայի տարածքային ամբողջականության ու ինքնիշխանության սկզբունքների վրա,
բ) Լիբիայում պետք է ստեղծվեն անվտանգ մի շարք գոտիներ և վերջ տրվեն ռազմական գործողություններին,
գ) Լիբիայում պետք է իրականացվեն լայնամասշտաբ ժողովրդավարական բարեփոխումներ, որոնք լիբիական ժողովրդին հնարավորություն կընձեռեն այսուհետ ընտրելու իր ղեկավարներին և ճանապարհ կհարթեն սահմանադրական կարգի հաստատման համար: