ԱՄՆ նախագահի թեկնածու Դոնալդ Թրամփը, որն ավելի վաղ վիճել է Հռոմի պապ Ֆրանցիսկոսի հետ, հայտարարել է, որ «խորապես հարգում է» Պապին և պատրաստ է նրա հետ հանդիպել ցանկացած ժամանակ՝ քննարկելու տարաձայնությունները: Այս մասին նա հայտարարել է Հարավային Կարոլինա նահանգում ընտրողների հետ հանդիպմանը, որը հեռարձակում է CNN հեռուստաալիքը:
Թրամփը հայտարարել է, որ պատ կկառուցի Մեքսիկայի հետ սահմանին՝ անօրինական ներգաղթյալներին երկիր չթողնելու համար, և որ Մեքսիկան կվճարի այդ պատի համար: Հռոմի պապը հինգշաբթի ասել է, որ «մարդը, որը մտածում է միայն պատերի կառուցման մասին… քրիստոնյա չէ»:
«Ես խորապես հարգում եմ (Հռոմի) պապին… Կարծում եմ՝ նա շատ լավ գործ է անում, նա շատ էներգիա ունի: Բայց ես կարծում եմ՝ նրան ճիշտ չեն հասկացել, նաև՝ նրան ոչ ճիշտ տեղեկություն են տրամադրել»,- ասել է Թրամփը:
Նրա խոսքով՝ պատի կառուցման ծրագրերի մասին Պապին այդպիսի «ոչ ճիշտ տեղեկություն» է հասցրել Մեքսիկան:
«Եթե նա լսեր մյուս կողմին՝ մարդկանց, որոնք ԱՄՆ-ում են ապրում… Ես պատրաստ եմ նրա հետ խոսել ցանկացած ժամանակ, երբ նա ցանկանա: Նա ինձ դուր է գալիս, դուր է գալիս որպես անհատ, ինձ դուր է գալիս այն, ինչ ինքը ներկայացնում է: Եվ ես, անխոս, խորապես հարգում եմ նրա դիրքորոշումը»,- հավելել է Թրամփը:
Դրանից մի քանի ժամ առաջ միլիարդատերը Հռոմի պապի խոսքերի մասին շատ ավելի կոշտ ձևով էր արտահայտվել՝ հայտարարելով, որ «զզվելի է, երբ հոգևոր առաջնորդը կասկածի տակ է դնում մարդու հավատքը»:
