ԵՄ առաջնորդները չեն հասել միության բարեփոխումների հարցով պայմանավորվածությունների, որոնք պնդում է Լոնդոնը։ Բանակցությունները Բրյուսելում կշարունակվեն երկկողմ ռեժիմով։ Այս մասին հայտարարել է Եվրախորհրդի ղեկավար Դոնալդ Տուսկը ԵՄ գագաթնաժողովի առաջին օրվա արդյունքներով՝ փոխանցում է TASS գործակալությունը։
«Մենք որոշակի առաջընթացի ենք հասել, սակայն շատ բան դեռ պետք է արվի»,- ասել է Տուսկը՝ հավելելով, որ իրեն ներկայում սպասվում են երկկողմ հանդիպումներ Ֆրանսիայի նախագահի, Մեծ Բրիտանիայի և Բելգիայի վարչապետների հետ։
Հիշեցնենք, որ անցած տարվա նոյեմբերին Մեծ Բրիտանիայի վարչապետ Դևիդ Քեմերոնը հանդես եկավ նախաձեռնությամբ՝ օրենսդրորեն սահմանափակելու ԵՄ այլ երկրներից ժամանած ներգաղթյալներին աշխատանքային նպաստների վճարումն ու հարկային արտոնությունների տրամադրումը, ինչպես նաև սպառնացել ԵՄ-ից երկրի դուրս գալով, եթե մյուս առաջնորդները չհամաձայնեն բարեփոխել միությունը և ավելի շատ լիազորություններ չտրամադրեն ազգային կառավարություններին ու խորհրդարաններին։
Եվրախորհրդում Մեծ Բրիտանիայի մի շարք պահանջներ համարվել են անընդունելի։
