Ռուսաստանը Սիրիայի իշխանություններին է փոխանցել նոր հականավային թևավոր հրթիռների խմբաքանակ: Այս մասին հաղորդում է The New York Times-ը՝ վկայակոչելով ամերիկացի բարձրաստիճան պաշտոնյաներին:
Թերթը հիշեցնում է, որ ավելի վաղ Մոսկվան Դամասկոս է ուղարկել «Յախոնտ» տեսակի հրթիռ: Տվյալ դեպքում խոսքը առաջադեմ ռադարներով հրթիռների մասին է, որոնք զենքի այդ տեսակն ավելի դիպուկ են դարձնում:
Փորձագետների խոսքերով՝ Սիրիայում ռուսական և իրանական սպառազինություններն ամրապնդում են Սիրիայի նախագահ Բաշար Ալ-Ասադի համոզմունքը, թե՝ նա կարող է հաղթել ռազմական ուղիով:
Հոդվածում նշվում է, որ այդ պատճառով ԱՄՆ-ին և նրա դաշնակիցներին բարդ կլինի սահմանել ծովային շրջափակում և ոչ թռիչքային գոտի Սիրիայի վրա կամ ավիահարվածներ հասցնել՝ սիրիական ընդդիմությանն աջակցելու համար, եթե, իհարկե, արևմտյան երկրները որոշեն միջամտել հակամարտությանը:
