Թուրքական Haber7 հեռուստաալիքի փոխանցմամբ՝ Թուրքիայի Ազգային հետախուզական կազմակերպությունը (MIT) զգուշացրել է երկրում ահաբեկչական նոր ակտեր իրականացնելու հնարավորության մասին։ Այդ մասին լրատվամիջոցին հայտնել են MIT-ում նրա աղբյուրները։
Հետախուզության տվյալներով՝ «Քրդստանի աշխատավորական» կուսակցության (PKK) ու նրա սիրիական թև «Դեմոկրատական միություն» կուսակցության (PYD) անդամները «ահաբեկչություններ են պատրաստում» Թուրքիայի միջազգային օդանավակայաններում։
Հաղորդվել է, որ «ահաբեկչություններ նախապատրաստելու» համար Թուրքիայի տարածք են ներթափանցել PKK-ի ու PYD-ի 14 անդամներ։ Թուրքական կողմի պնդմամբ՝ ահաբեկչությունները հանդիսանալու են Թուրքիայի կողմից Սիրիայի հյուսիսը հրետակոծելու պատասխանը։
